Siyaziqhenya ngesikole sangakithi esigila izimanga
yindlela othisha, abafundi, abazali nothishanhloko uMnuz Oscar V Kubheka abazimisela ngayo ekusebenzeni ekushiya umangele. Akunampelasonto lapha futhi akunamaholidi. Othisha basebenza ngokuzikhandla sonke isikhathi.
Ngikhuluma nje kunabafundi ababili okunguNontokozo Mtshali noNjabulo Ngwenya abebeyoklonyeliswa e-ICC nguNgqongqoshe wezeMfundo ngakho belu ukuzimisela okusezingeni eliphezulu. Laba bafundi bathole oDistinction kuzo zonke izifundo kanti bakhona futhi nabanye esikoleni abazishaye zonke ngamalengiso.
Ngo-Okthoba lesi sikole besinendumezulu yomcimbi lapho zonke izicukuthwane zezeMfundo noMkhandlu waseMajuba zaziphelele khona kubungazwa ukuphumelela kwekhwaya emncintiswaneni kazwelonke lapho saqopha khona umlando ngokuthola izindondo zikazwelonke ezine emikhakheni yeMale Voice, Afrikaans, African ne-Enoch Sontonga Song.
Okungihlaba umxhwele wukuthi umbhidisi wekhwaya yesikole nguye uKubheka ozibambela mathupha. Yena futhi waphinde waklonyeliswa ngokuba wumbhidisi ovelele kuzwelonke ngo-2017.
Ngeke sithule siyizakhamuzi sibona isikole sigila izimanga ngale ndlela. UKubheka uke wamenywa yinkampani i-ATKV ukuba ayokwethula inkulumo eCape Town ukuze acobelele abanye ukuthi wenza ngani njengoba isikole sigila izimanga. Uphinde wamenywa nguNgqongqoshe wezeMfundo, uNkk Angie Motshekga, ukuba ayochaza futhi ukuthi wenza ngani ukuze aphumelele kangaka. Uyabona nje uSifiso Hlanti odlala ibhola eqenjini lesizwe nakwiBidvest Wits naye ungumphumela wakhona eZama High.
Ngabuye ngezwa uLucky Nkosi umsakazi woKhozi FM ebongela lesi sikole nezinye ezigile izimanga ku-matric.
Impela kufanele sikubabaze okwenziwe yisikole sangakithi esihlula ngisho ezabelungu ezinazo zonke izinsiza kufunda. Ngiyaziqhenya ngokusebenza kahle kweZama High nothisha abafundisa khona. Phela vele umntwana kumele afundiswe ngokuphelele ebe edlala futhi ezigcina ephephile kuzo zonke izinto. LTM Sibiya EMAJUBA