Usazoqhubeka nokubonakala kwithelevishini oshiya uMuvhango
USAZOQHUBEKA nokubonakala kwithelevishini obengumlingisi weMuvhango, uBuhle Samuels olingisa indawo kaMatshidiso kulo mdlalo, oveze ukuthi uyashiya kuwo maduze.
Le ntokazi ebisineminyaka emihlanu kulo mdlalo iveze ukuthi ishiya kuwo nje ngoba ifuna ukukhula kwezinye izinto ezithinta ithelevishini.
Enkulumeni abe nayo neSolezwe uthe umculo ngenye yezinto afuna ukugxila kuzona kakhulu.
“Noma ngingeke ngiveze manje ukuthi ngizokwenzani ngempela kodwa kuthelevishini ngisazobonakala ngenza izinto ezahlukene abantu akade bengacabangi ukuthi ngiyakwazi ukuzenza. Ngiyabonga kakhulu ithuba engilithole kulo mdlalo njengoba ngifunde okuningi futhi kube yiwona owokuqala ukugqamisa ithalete lami ekulingiseni,” kuchaza uBuhle. Uthe ngisho ekulingiseni usazobonakala kodwa okwamanje akukabi bikho okubambekayo.
“KuMuvhango ngigcine ukuqopha ngonyaka odlule ngoSepthemba. Ngakho nami angikakazi ukuthi ngizogcina nini ukubonakala kulo mdlalo,” kusho uBuhle.
Kwenzeka lokhu nje ngoLwesibili uPhindile Gwala obelingisa indawo kaNoni ubegcina ukubonakala kulo mdlalo.
U-Amanda Ngudle okhulumela lo mdlao ukuqinisekisile ukuthi le ntokazi ibisivalelisa kulo mdlalo.
UPhindile wamemezela izindaba zokushiya kuwo ngonyaka odlule.
Muva nje kuvele ukuthi kukhona ifilimu akade eyiqopha phesheya kwezilwandle.
Omunye umlingisi ogcine ukubonakala kuleli sonto uThando Thabethe obelingisa indawo kaNolwazi kwiGenerations: The Legacy.