Izingoma zikaMandoza ezintsha kugujwa olokuzalwa
KUSEKUDE ukuthi likhohlakale igama lomculi we-kwaito uMandoza njengoba kunenqwaba yezingoma zakhe ezisazokhishwa yize esalala kobandayo.
UMandoza ushone ngoSepthemba ka-2016 ngemuva kokuxinwa yisifo somdlavuza wobuchopho.
UVaughn Eaton weMandoza Holdings, uthe bazimisele ngokuthi lingashabalali igama lalo mculi wodumo lwezingoma okubalwa kuzo iNkalakatha, Godoba nezinye.
Uthe sebevele bekhiphe izingoma ezimbili uMandoza aziqopha ngaphambi kokuthi ashone. Kukhona ethi Back For More edidiyelwe nguGabi Le Roux owenza iNkalakatha nethi Mandoza Tshabalala kaPascal noMandoza. Lezi zingoma zitholakala ezitolo zomculo ze-internet njenge-iTunes.
“UJanuwari 17 ku-2018 wusuku lokugubha ukuzalwa kukaMandoza lapho ebezohlanganisa khona iminyaka engu-40. Sifuna ukugubha usuku lwakhe lokuzalwa ngokwethula iBack For More nezimpahla zakhe zokugqoka ngokubambisana neMagents Clothing,” kusho uVaughn.
Uthe basazokukhipha nezindala abazozenza kabusha.
“Sizokwenza nemicimbi abonakale nge-hologram ngoba sigubha nempilo yakhe,” kusho yena.
Ngo-2013 kwake kwenziwa i-hologram kaBrenda Fassie ecula emcimbini iHansa Festival of Music Legends eGoli. Kusetshenziswa ubuchwepheshe bama-projector umuntu abonakale sengathi ukhona futhi enyakaza.
UVaughn uthe okwamanje basazodayisa izikibha ezitholakala esitolo se-internet u- www.mandozaholdings.co.za. Ezinye zizotholakala ezitolo zakwaMagents.
“Ngonyaka ozayo sizozandisa izimpahla mhlawumbe sethule ama-jean, izicathulo namakepisi,” kuchaza uVaughn.
Uthe inzuzo ezokwenziwa izoya kwiMandoza Foundation, okuyinhlangano ephethwe yinkosikazi kaMandoza, uMpho, ezokuya emalokishini iyoxwayisa ngomdlavuza.
UVaughn uthe uMpho nezingane baqhuba kahle.