Usengumlingisi obengumethuli wezinhlelo
OBENGUMETHULI wohlelo iSelimathunzi olukhonjiswa kuSABC1 ngoLwesibili uthi into emenze walushiya phansi lolu hlelo ukuthi ubesezimisele ngokugxila ekulingiseni.
ULunga Shabalala ushiye kulolu hlelo ngemuva kweminyaka elwethula, ulandele ezinyathelweni zikaZizo Tshwete naye oshiye lolu hlelo ngemuva kwesikhathi eside elwethula wajoyina uMhlobo Wenene.
Kusuka ngoJanuwari 29, uLunga uzobonakala emdlalweni iThe River ezokhonjiswa esiteshini I-1Magic (DStv channel 103).
Kulo mdlalo uzobe elingisa indawo kaLindani ongumsebenzi wasemayini.
Engxoxweni abe nayo neSolezwe uLunga uthe okwamanje ayikho into asafuna ukuyenza ethinta ithelevishini ngaphandle kokulingisa.
“Abantu abaningi abenza kahle ekulingiseni impumelelo yabo ilele ekugxileni kulowo mdlalo abasuke bewenza ngaleso sikhathi futhi banikele ngesikhathi sabo sonke kuwo. Nami ngizimisele ukwenza kanjalo ukuze ngikhule ekulingiseni. Ngingasho ngingananazi ukuthi ngisamile ekwethuleni izinhlelo okwamanje njengoba ngifuna ukubhekana ngqo nokulingisa,” kusho uLunga.
Uthe kulo mdlalo uzothandana nentokazi ezokwaziwa ngoTumi (Larona Moagi) elingisa enye yezindawo eziphambili kulo mdlalo.
“Kunemindeni emibili ezogqama kulo mdlalo, owakwaMokoena nowakwaDlamini futhi kukhona impi embi phakathi kwayo, ngingasho nje ukuthi ibhekene ngeziqu zamehlo. ULindani naye uzozithola ephakathi engxabanweni yale mindeni. Kodwa ngaphandle nje kokuba phakathi kwengxabano yale mindeni naye uLindani unezinkinga zakhe ezizogqama nje eziqeshini zokuqala ezimbili,” kuchaza yena.
Kulo mdlalo kulindeleke ukuthi kubonakale abalingisi okukhona kubo uSindi Dlathu ozobe elingisa indawo kaLindiwe, Hlomla Dandala (Zweli), Lawrence Maleka (Zolani) noDon Mlangeni ozobe elingisa indawo kaThato.