IZINKONDLO
Uyadel’ uGuqa okwengamele ekuvikela
Liyadel’ iBululwane elikugezise lajokola
Qhephuka ngqakala natsheketsh’ alisenakukuthinta
Tshani thobelani imilolongo enyathelayo.
Akuseyukuma lutho phambi kwakho
Wena uyimbali yezimbali esizweni
Khul’ ujabulis’ isizwe nokhokho.
Wo ngalowo nonjinjikaz’ othenjiwe
Izingane zikhuz’ uhleko yintokozo
Zisho ngemintongolozo yamazwi zenamelene
Njengomban’ ongaziwa siqalo nasiphetho
Zakhuhluzeka, zakhahlazeka, zangqimzeka zakhithizeka
Ndundulu, noziga, waphinda wasikholisa!
Koba liziko lokubasel’ izilungonqangi
Intsha yakusasa soyothis’ igqanqule
Ith’ iyofinyelel’ esicongweni sobuqhawe.
Ntombi nto zeNkos’ esenaphumula
Namuhla ningamathonga obuhle nokulunga
Kasinamandl’ okunibuza beningabavikeli ngani
Sinesibindi sokunicela wahlangabezen’ amaqhawekazi
Ahambel’ enkonzweni enanikuyo yesizwe
Zemukeleni ezinhlwini zamakhosazana kaNomkhubulwana. OEHM Nxumalo
Huba Ndlondl’ enophaph’ ekhanda, sibhek’ empini,
Impi yokubhekana ngqo nokulitshalwa kwamahubo,
Amahub’ ayinsika yesiko nomlando wesizwe,
Isizw’ esigabe ngamagug’ angefaniswe nawabezizwe.
Ngingelilibal’ igalelo likaMntwana wakwaZiphethe,
Umehl’ abhek’ ingath’ akhathele, Athath’ indoda phansi, Yatwetwa kwajuluk’ ibhulukwe.
Ubuyinqolobane yamahubo esigabe ngawo kwaZulu,
Konke lokho kwaphenduk’ iphupho,
Ngenkath’ abadala bekuqhweba Nyoni Kayiphumuli;
Kudel’ abakuzw’ uhub’ amahubo kulowo mhlaba wabangasekho;
Ngisho kuwe Sehla senyuk’ ezintabeni zeNgwavuma noBombo,
Ngisho kuwe Zinyane likaMnyayiza kaNdabuko kaMpande,
Ngisho kuwe Nqolobane yamahubo esigabe ngawo kwaZulu. Bongani Mavuso