ISuzuki Auto izovula amagaraji amasha
IHLELA ukuvula amagaraji amasha kuleli nasemazweni angomakhelwane iSuzuki Auto ezishaya isifuba ngokuba nonyaka omuhle nyakenye.
Ngaphandle nje kwamagaraji amasha, le nkampani izokwethula izimoto ezintsha kulo nyaka.
“Okunye okwenze saphumelela ngo-2017 ngamagaraji ethu azimisele,” kusho u-Andre Venter oyiNhloko yezokudayisa nokumaketha kwaSuzuki.
“Sizokweseka isibalo esikhula ngokushesha samakhasimende ethu ngokuvula amagaraji amasha eNingizimu Afrika yonke kanjalo nasemazweni angomakhelwane,” kusho uVenter.
Uthe kulo nyaka balungiselela unyaka omatasa ngasekuthengweni kwezimoto zabo njengoba bephothule unyaka odlule bephule irekhodi labo.
Le nkampani iphinde yamemezela nokunyisa kwayo i-warranty ezimotweni zayo kule kota yokuqala yonyaka.
“Ngesikhathi sisalinde izibalo zonyaka wonke zakwaNaamsa, sesivele sidlule irekhodi lethu lokudayisa lonyaka kuya kuNovemba 2017 njengoba sidayise izimoto ezingaphezulu kuka-8 000,” kusho yena.
Uthe yize belindele izibalo ezikhombisa ukuthi benze kahle ngoDisemba kodwa ngeke zizidlule ezikaNovemba ezaba yirekhodi kule nkampani.
Le nkampani yethule i-warranty yeminyaka emihlanu noma ibanga lika-200 000km kuzo zonke izimoto ezidayise kuze kuphele unyaka odlule.
Le nkampani ithe izonyusa amanani ezimoto zayo ngo1.5% ngaphandle kwe-Ignis eyintandokazi.