Bacikekile abazali isikole sibehlisa sibenyusa
BAPHUME benxapha izolo abanye abazali bezingane ezifunda eBonela Primary, eMayville eThekwini, ezingakabhalisi kusukela kuvulwe izikole ngoLwesithathu oludlule.
Iningi lalaba bazali izingane zabo ebezivele zifunda khona, likhala ngothishanhloko omusha okuthiwa uqinisa ikhanda ngisho isidingo singekho. Abazali abakhulume neSolezwe bathe sebesaba nokuthi bazoxoshwa emsebenzini ngenxa yokugqigqa kulesi sikole. Bakhala ngokuthi kudingeka imininingwane eminingi ukuze babhalise izingane, eminye ebingafuneki phambilini. Umzali wengane eyofunda uGrade 5 ongathandanga ukudalulwa, uthe uqale ngokuyokhokha imali yesikole ebhange, wabuyisa isiliphu esikoleni ngesonto eledlule.
“Ngimangele kuthiwa kumele ngifike neminye imininingwane yengane, (ingane) yangangena ngisho ekilasini. Ngitshelwe ukuthi sekufuneka izitifiketi zokuzalwa ezintsha, kwadingeka ngiye eMnyangweni wezaseKhaya ukuyosenza. Kufuneka ngisho ikhadi lomgomo, okuyinto esazi ukuthi idingena uma ingane izoqala isikole. Sengisaba ngisho ukucela emsebenzini ngoba akupheli ukubhalisa kulesi sikole,” echaza.
Omunye othe naye ingane yakhe iyofunda uGrade 5, uthe ngonyaka odlule wagcwalisa ifomu yokuthi ingane iyabuyela esikoleni. Uthe ubengazi ukuthi kuzophinde kufuneke yonke imininingwane ekubeni ingane kade ifunda kusona isikole.
Omunye umzali onqabile ukukhuluma nephepandaba, uphume enxapha ekhala ngokumosheka kwesikhathi. Utshelwe ehhovisi lokubhalisa ukuthi kudingeka ayokwenza isitifiketi sokuzalwa esisha sengane. Izingane ebezigqoke umfaniswano bezincike ngezindonga, ezinye zihleli phansi ngasesangweni zilinde ukubhalisa. Izincwadi ezibhalelwe abazali ngoJulayi ziveza ukuthi ayikho ingane ezocatshangelwa ngoba kade ifunda kusona lesi sikole kodwa kuthathwa abafike kuqala.
Okhulumela uMnyango wezeMfundo KwaZulu-Natal, uMnuz Sihle Mlotshwa uthe abahambisani nokuthi kube khona abafundi abasilela emumva sezivuliwe izikole.
Uthe bayakugcizelela nakothisha ukuthi ukufunda nokufundisa kumele kuqale uma sekuvulwe izikole.
“Kunenkinga yesibalo esikhulu sabafundi abafuna izikole kuleya ndawo, yingakho ukubhalisa kuthatha kancane.
Siyazama ukwenza izindlela zokuthi silungise lesi simo sokugcwala kwezikole. Sizothumela izikhulu esifundeni ukulungisa lesi simo eBonela Primary,” kusho uMlotshwa.