Amazwi enduduzo ngokudlula kukaBra Hugh
KUGADLE kwezwela kwabaningi ukudlula emhlabeni kukaBra Hugh njengoba amazwi enduduzo engene elakanyana.
UBra Hugh ushonele esibhedlela izolo ekuseni ngemuva kokuxinwa wumdlavuza wamankwahla.
Umdidiyeli womculo ophinde acule owokholo, uMthunzi Namba, uthe uhlukumezeke kakhulu ngokushona kwale ngwazi.
Uthe ngemuva kokuthola ukuthi uBra Hugh uyagula wamthumelela umyalezo efuna ukuzwa impilo.
“Wangiphendula wathi uyaphila wabonga. Namanje lowo myalezo wakhe ngisenawo,” kusho uMthunzi ongomunye wabasunguli beJoyous Celebration.
Uthe abantu abaningi abazi ukuthi bayididiyela ngokuhlanganyela i-albhamu kaBra Hugh iThe Best Of Hugh Masekela ngesikhathi esasebenza eSony.
“Sasenza kabusha nezinye izingoma ezazivaliwe ngesikhathi sobandlululo. Kwaba yisibusiso ukusebenza naye. Ubewubaba futhi ewubhuti omdala. Ngafunda lukhulu kuye, uma usebenza naye ubuhlale uhleka,” kusho uMthunzi.
Umculi waseThekwini, uZakes Bantwini, opike uBra Hugh engomeni ethi Dancing Trumpet ekwialbhamu yakhe yakamuva ethi Love, Light & Music 2 uthe balahlekelwe kakhulu. “Angazi ngingakutshela kanjani ukuthi inhliziyo yami ibuhlungu. Silahlekelwe kakhulu,” kusho uZakes.
UBlack Coffee, owenza kabusha ingoma kaBra Hugh ethi Stimela baphinde benza iWe Are One, uthe uphelelwe ngamazwi.
Ilungu leMafikizolo, uTheo Kgosinkwe, lichaze le ngwazi njengendoda ebilungile.
“Ubehlale exoxa izindaba futhi esicobelela ngolwazi. Isipho sakhe sokucula ubesabela umhlaba. Siyabonga ngeqhaza lakho eNingizimu Afrika,” kusho uTheo.
IMafikizolo ike yasebenza naye engomeni ethi Kwela ngesikhathi isaphelele.
“Ngibe nethuba lokucula ngokuhlanganyela nawe kwi-albhamu yami ngedwa. Ngempela ubuyindoda elungile,” kusho uTheo ekhasini lakhe kwi-Instagram.
Ezinkundleni zokuxhumana igama likaBra Hugh belisemagameni obekukhulunywa ngawo kakhulu njengoba abantu, okubalwa kubona nosaziwayo, bebephawula ngokushona kwalo mculi.
UThandiswa Mazwai abenza naye ingoma yodumo ethi Thanayi, akandanga ngamazwi uvele wafaka igama elichaza ukuthula elithi ‘hush’ ekhasini lakhe kwiTwitter.
UMengameli Jacob Zuma uthe imboni yomculo kanjalo nezwe kulahlekelwe kakhulu.
“Iqhaza aba nalo ngesikhathi kusalwelwa inkululeko ngeke silikhohlwe. Sifisa ukudlulisa amazwi enduduzo emndenini, kubangani kwezobuciko namasiko. Sengathi angaphumula ngokuthula,” kusho uZuma.
Umengameli waseKenya, u-Uhuru Kenyatta, uthe umhlaba ulahlekelwe yiqhawe.