I-Santaco isukumela olodlame
UBUHOLI beSantaco esifundeni iDurban West sebuzwakalise ukukhathazeka ngezigameko zokuqothwa ngenhlamvu kosomatekisi bakasoseshini waseMpumalanga (Hammarsdale) njengoba kudutshulwe ababili kuleli sonto.
Njengamanje usoseshini waseHammarsdale awunaye usihlalo kwazise uMnuz Mbhekeni Hlophe obekulesi sikhundla ubulawe ngoKhisimusi, iPhini lakhe uMnuz Dumisani Magwaza labulawa ngoJulayi nyakenye.
NgoMsombuluko kubulawe uMnuz Mthethomusha “Mthetho” Ngubane noMnuz Mnuz Stephen Somfana Makhaye.
USihlalo weSantaco eDurban West, uMnuz Mathula Mkhize uthe banezinyanga ezintathu beqokiwe njengobuholi obusha kulesiya sifunda kodwa abakuqaphelile wukuthi inyanga ayipheli kungabulawa usomatekisi eHammarsdale.
“Sinohlelo lokuvakashela ososeshini abangu-20 abangaphansi kwethu, besizohamba ngohlu oluthile kodwa ukubulawa kwabantu eMpumalanga sekuholele ekutheni sihlele ukuya khona kuleli sonto. Sizohlala phansi namalungu kasoseshini waseMpumalanga ukuze sizwe ngawo ukuthi inkinga ikuphi. Emuva kwalowo mhlangano sizobe sesihlangana noNgqongqoshe wezokuThutha uMnuz Mxolisi Kaunda nezinhlaka zokuphepha ukuze kuziwe nekhambi lokuvimba ukubulawa kwabafowethu,” kusho uMkhize.
Ugqugquzele osomatekisi ukuthi uma kukhona ukungaboni ngasolinye bahlale phansi baxoxe njengosomabhizinisi kunokuthi badubulane.
“Asifuni kuze kufike esigabeni sokuphazamiseka kokuthuthwa komphakathi njengoba kwenzekile kwezinye izindawo. Siyacela osomatekisi baxoxisane uma kukhona ukungaboni ngasolinye. Sizoxoxisana noKaunda ukuthi aqinise ezokuphepha kubanikazi bomsebenzi ngoba eMpumalanga kubulawa bona abagibeli abathinteki ndawo,” kusho uMkhize.
Ebuzwa ukuthi ngabe zikhona yini izinhlelo zokuthi kube nokhetho kusoseshini waseMpumalamga njengoba kunezikhala ezimbili ebuholini obuphezulu, uthe bonke ososeshini kufanele babe nobuholi obuphelele kodwa bazoqale bahlangane namalungu aseMpumalanga ngaphambi kokwenza izincomo zokuthi kube nokhetho beyisifunda. Isifunda iDurban West singamele izindawo ezakhele iPinetown namaphethelo kanti kunososeshini abangu-20 ohlwini lwalesi sifunda ekubeni kunososeshini omncane Inteke Taxi Owners Association.
UMkhize uthe usazohlangana namalungu obuholi baseNteke ngoba lo soseshini akawazi emabhukwini akhe. “Sizoxoxisana nabo, sizwe ukuthi basebenza kanjani sihlahle nendlela eya phambili ngekusasa labo njengoba besebenza esifundeni sethu. Njengamanje uhlu lunososeshini abangu-20, Inteke ayikho kulona.”
Amaphoyisa athe asaphenya ngokubulawa kwamadoda amabili eHammarsdale kanti bekungakaboshwa muntu.