Isifiso sikaHugh ngomngcwabo wakhe asishiye emndenini
NGEKE ahlonishwe ngomngcwabo wombuso uHugh Masekela (78), oshone ngoLwesithathu ngemuva kokugula ephethwe umdlavuza wamankwahla.
UHugh sekuvele ukuthi wawutshela umndeni wakhe ukuthi uhulumeni ungamenzeli lolu hlobo lomngcwabo.
Lezi zindaba zivezwe uZimasa Velaphi osebenza ehhovisi likaNgqongqoshe wezobuCiko namaSiko kuzwelonke uNathi Mthethwa izolo.
Enkulumeni abe nayo neSolezwe uthe ngoLwesibili uMthethwa uhambile wayobona umndeni wakwaMasekela lapho ezwe khona lezi zindaba.
“UNgqonqgoshe ufike wezwa emndenini ukuthi uhulumeni angazihluphi ngokulungiselela le ngqalabutho umngcwabo wombuso. Kuvele ukuthi wawutshela umndeni wakhe ukuthi emngcwabeni wakhe ufuna kube khona umndeni, izihlobo, abangani nabalandeli bakhe abazomvalelisa ngendlela abafisa ngayo,” kusho uZimasa. Uthe babe sebelandela umyalelo abawuthole emndenini ngesifiso sikaMasekela. Le ngqalabutho okudumale iningi idlula emhlabeni, namhlanje umndeni wayo uzocacisa ukuthi izofihlwa nini.
Lokhu kuvele izolo njengoba namhlanje kuzoba nesithangami sabezindaba la umndeni uzomemezela uhlelo oluzolandelwa.
Uma kuziwa ezinweleni zokufakelwa ezijwayelwe ngabesifazane, uHugh wakuveza ukuthi akazithandi. Ngisho osaziwayo bekubaphoqa ukuthi bashuqule ukuze bathole isithombe naye.
UDineo Ranaka noKhabonina Qubeka bangabanye bosaziwayo ababhekana nalowo mshophi. Omunye wozakwethu uCharles Khuzwayo uveze ukuthi wake wamshayela ucingo uHugh, embuza ngenkolo yakhe engosini ephuma kwiSolezwe ngoMgqibelo ethi Sidumisa Naye. UCharles ebuza uHugh ukuthi uyakholwa yini, wamtshela ukuthi akakholelwa kuJesu. Ngonyaka odlule ngihambele umcimbi wokumhlonipha ngeziqu zobudokotela eNyuvesi yaKwaZulu-Natal, eWestville, ebuzwa ukuthi uthini ngendlela izwe eliphethwe ngayo wakubeka kwacaca ukuthi ukube kuya ngaye ngabe ubuholi obukhona buyashintshwa. Wathi izwe abalilwela bayohlala ekudingisweni babengafuni liphathwe ngendlela okwenzeka ngayo manje.