Bamshisa ngabilayo bamshayela ngesipikili
KUBOSHWE abalisa ababili abasolwa ngokushisa ngamanzi, bashayela isipikili kumlisa (26) waseBhamshela ngaseNdwedwe ababemsola ngokweba.
Laba balisa, oneminyaka engu-27 nonengu-32 kuthiwa bashisa lo mlisa ogama lakhe ligodliwe, ngamanzi ngoba bemsola ngokweba.
NgoLwesibili bavele eNkantolo yeMantshi KwaMaphumulo ngamacala okushaya ngenhloso yokulimaza.
Okhulumela amaphoyisa KwaZulu-Natal uCaptain Nqobile Gwala uthe kukholakala ukuthi laba balisa bathatha lo mlisa bamyisa endlini yabo ngoba bemsola ngokugqekeza antshontshe amathelevishini amabili.
Kuthiwa bambopha izandla nezinyawo, bathela amanzi abilayo ezindlebeni zakhe base bemshayelela isipikili esandleni basihlanganisa nepulangwe. Kuthiwa abagcinanga lapho, bamshaya. Lo mlisa ube esephuthunyiswa esibhedlela eyolashelwa amanxeba, wasinda.
“Amaphoyisa avula icala lokulimaza ngenhloso, esiteshini samaphoyisa eNsuze. Uphenyo lwamaphoyisa luholele ekutheni kuboshwe abalisa ababili. Owesithathu usagcwele amathafa,” kusho uCaptain Gwala.
Laba balisa baboshwe ngoMsombuluko ngesikhathi amaphoyisa ephume umkhankaso wokubafuna efuna.
Kulindeleke ukuthi bagcinwe esitokisini kuze kube baphindela enkantolo ngoFebhuwari 7 ngesikhathi kusaphenywa.
Khona manjalo kuboshwe umnikazi wesitolo ngokukhomba ngesibhamu owesifazane (31) ngoba emsola ngokuba yingxenye yezigebengu ezaphanga isitolo sakhe.
Lo mlisa (30) uboshwe emuva kokuthi lona wesifazane ebike emaphoyiseni ukuthi wamkhomba ngesibhamu emsola ngokwakha itulo lokuphangwa kwesitolo sakhe.