Usolwazi ugxeka i-ANC ngolomhlaba
USOLWAZI Jabulani Maphalala ongusomlando ukhwele wadilika kwi-ANC wathi iyishaya emuva naphambili odabeni lokubuyiselwa komhlaba kubanikazi bawo.
Ethula inkulumo yakhe emhlanganweni wamakhosi e-ICC eThekwini izolo, uMaphalala uthe i-ANC ngeke ize iwubuyisele umhlaba kubanikazi bawo.
“Baqale bathi umhlaba kumele uthathwe ngaphandle kwezinxephezelo, gwiqiqi sebethi umhlaba kumele uthathwe kodwa akumele kuphazamiseke umkhiqizo wokudla, baphinde bathi ukuthathwa komhlaba akumele kuphazamise umnotho. Konke lokhu kusitshelani?” kusho uMaphalala.
Uthe njengoba manje sekuneziphakamiso zokuthi kuqedwe Ingonyama Trust, leyo mizamo izokwenza izaba ohlelweni lokubuyiswa komhlaba,
“Bafuna ukuthi manje kunakwe indaba yeNgonyama Trust, ukuze abantu bakhohlwe uhlelo lokuthi kuphucwe abelungu umhlaba,” kusho uMaphalala.
Ubuze ukuthi yingani uhulumeni efuna ukuthatha ingcosana yomhlaba eyasala kuZulu kodwa kube kunomhlaba omningi osezandleni zabamhlophe.
“Yini kumele kuxoxwe indaba yomhlaba owantshontshwa ngabelungu?” kubuza uMaphalala.
Uthe lo mhlaba kaZulu uhulumeni afuna ukuwudla usemahlathini, uyeka umhlaba ovundile ogudle ulwandle osetshenziswa ngabelungu.
“Umhlaba uyalwelwa njengoba naKwaZulu walwelwa ezimpini eziningi ezahlukene ezaziwayo emlandweni,” kusho uMaphalala.
Uxwayise uZulu ngokuthi kumele ahlale eqaphile ukuze angazunywa “yimpi”.
“Kwakungcono eSandlwana. Impi yakhona yafika siyibhekile, lena ngibona sengathi izosigubuzela ngoba izoza singazelele,” kusho uMaphalala.
Uthe isigungu sobuholi bomdabu kumele siyokhonza eSilweni kubhungwe ngalolu daba lokuthathwa komhlaba.