Uqale isigwebo owamanga ngengane
UKHIHLE isililo unina wengane waseMaphephetheni, eNanda, ngesikhathi egwetshwa iminyaka emihlanu ebhadla ejele ngamacala athinta ukuqamba amanga ngokuduka kwengane enenyanga.
Uthisha kaGrade 1 oneminyaka engu-35 akazange akholwe ngesikhathi egwetshwa izolo eNkantolo yaseThekwini ngecala lokukhwabanisa, elokuphazamisa ukusebenza komthetho nelokubhalisa isitatimende esifungelwe esingamanga.
IMantshi uMnuz Anand Maharaj egweba lo wesifazane obelokhu ehlome ikhanda phansi uthe isenzo sakhe saba nobuwula phakathi njengoba aqambela umhlaba wonke amanga.
“Kwanyakaza umhlaba wonke ngenxa yokulahleka kwengane yakhe. Abantu bakhombisa ubuntu, kwabizwa lonke uhlobo lwephoyisa ukuze kutholakale ingane yakhe ekubeni azi kahle ukuthi ayilahlekile.
“Wazenza isiphukuphuku emphakathini. Awuzange ucabangele izingane zakho ukuthi umphumela wokuqamba kwakho amanga ungazihlukumeza. Ngikugweba iminyaka emihlanu ubhadla ejele,” kusho uMaharaj.
Ngokwalesi sigwebo lo thisha angadonsa izinyanga ezingu-18 ejele bese ededelwa. UMaharaj uthe umangalile ukuthi lo thisha akazange ethule ubufakazi bokuzicelela isigwebo esincane.
“Ummeli wakho uthi uyazisola ngoba wasebenzisana namaphoyisa futhi wavuma necala, nofakazi bakho baveze ukuthi uyazisola. Angikholwa kahle ukuthi uzisola ngempela ngoba sizwile amaphoyisa efakaza ukuthi wena awuzange uvele uwatshele nje ukuthi ingane uyayazi, wawusuphenywa wagcina uvumile. Akukhona ukuzisola lokho, wukulahlwa unembeza nje,” kusho uMaharaj. IMantshi ngaphambi kokuba imgwebe lo wesifazane obefake ingubo eluhlaza sasibhakabhaka, neduku ekhanda, ebeke nelinye iduku emahlombe, ifunde imiyalezo kuFacebook.
“Kunemiyalezo evela kubantu abanye bakwamanye amazwe bekhala nawe ngokulahleka kwengane. Kwaba nababekhuleka imini nobusuku bethandazela ukuba ingane ibuye. Wadlala ngabo bonke laba abantu,” kusho uMaharaj.
Eminye yemiyalezo ayifundile yakuFacebook yayifakwa ngesikhathi lo wesifazane eseboshiwe. Eminye yemiyalezo ibiveza ukuthi lo wesifazane akafanelwe ukuba umama nokuthi akaboshe ukhiye uphoswe ekujuleni kwesiziba.
Lo thisha ubelokhu ehlome njalo ikhanda phansi, abuye esule izinyembezi ebezigeleza emehlweni.
Enkantolo bekukhona abomndeni wakhe okubalwa umyeni wakhe nonina, abamncengele kakhulu ukuba angayiswa ejele.
Kuthe esegwetshiwe ummeli wakhe uMnuz Mfanafuthi Biyela, waya kuye bahleba imizuzwana. UBiyela ubesetshele inkantolo ukuthi ufuna ukulidlulisa icala. Isicelo sakhe sichithwe umshushisi uNkk Kuveshni Pillay, imantshi uMaharaj naye usichithile.
Lo thisha akabange esabuyela emndenini, ufakwe ezitokisini njengoba kulindeleke ukuba ayoqala isigwebo sakhe.
Udaba lokuduka kwengane yakhe edunwa imoto eCity View lwaba ngundabamlonyeni ngoMashi 10 nyakenye. Ingane yatholwa ngezintatha zesonto kuyise (27) wangempela, naye owagcina eboshiwe. Kumanje uhamba icala. Ngokusho komphenyi kuleli cala, uColonel Langa Mhlongo, othule ubufakazi izolo, wathola ukuthi lo wesifazane unolunye ucingo alufihlile alokhu exhumana ngalo noyise wengane.
Uthe esemphonsa ngemibuzo wagcina evumile ukuthi ingane uyinikeze uyise wangempela ukuba iyokwenzelwa usiko kubo. Kwathintwa uyise wengane ukuba ayibuyiswe, waboshwa esendleleni eya esiteshini samaphoyisa.