UMahlangu ukhala ngokuphepha esigcawini
OWAYENGUNGQONGQOSHE wezeMpilo eGauteng, uNkk Qedani Mahlangu, izolo wazise isigcawu esiphenya ngokufa kweziguli ezasuswa eLife Esidimeni zayiswa ezikhungweni ezingenzi nzuzo ezingekho emthethweni, ukuthi akaphephile.
UNkk Mahlangu uveze lokhu osukwini lwesibili ephekwa ngemibuzo kulesi sigcawu esiphenya ngokufa kweziguli eziwu-143.
Wazise iJaji Dikgang Moseneke ukuthi wahlangabezwa amaphoyisa esikhumulweni sezindiza esuka e-United Kingdom, lapho abefunda khona. Uthe amaphoyisa awazange amazise izizathu zokuhlangana naye. “Kwenzeka into engajwayelekile kubhekisiswa i-passport yami ngesikhathi ngehla ebhanoyini. Ngiqeda ukuthatha izikhwama zami, kweza amaphoyisa amabili athi athunywe yizikhulu zoMnyango wokuVikelwa koMbuso,” kusho yena. Uthe ngoLwesibili bekune-drone (ikhamera enophephela emhlane, endizayo) ebindiza ngaphezu komuzi wakhe.
“Bengithi ngifuna ukukubeka ngendlela lokhu. Asikho isidingo sokuthi kube khona ozongihlukumeza,” kuqhuba yena.
Uthe le-drone ihlale isikhashana waze waziswa onogada bakhe ngayo. Lolu daba uthe useludlulisela eMnyangweni wezokuPhepha koMphakathi.
UMoseneke ucele omele uMbuso, u-Adv Tebogo Hutamo, ukuthi axhumane namaphoyisa abuye nezimpendulo ngoLwesine.
Ngesikhathi ephendula imibuzo ngoMsombuluko, ngaphandle kwekhomishini abantu babebhikisha abanye babo bethi bafuna abekwe icala aboshwe uMahlangu njengoba bemsola ngokuthi igazi leziguli ezashona lisezandleni zakhe.
UMahlangu wakuchitha ukuthi wayengubhongoza esinqumeni esathathwa sokususwa kweziguli eLife Esidimeni, wathi sathathwa ngokuhlanganyela nabanye eMnyangweni wezeMpilo eGauteng.
Ikhomishini isaqhubeka.