Abagudluki kwabakushoyo abeNafupa SA
PHEZU kokuba sebegxekwe nxazonke abangcwabi beNational Funeral Practitioners Association of South Africa (Nafupa SA) abathi ngeke balubhade emalokishini nasezindaweni zasemakhaya abangcwabi bezinye izinhlanga kodwa basamile ekutheni ngoFebhuwari 1 nonyaka ababafuni laba bangcwabi kulezi zindawo.
Le nhlangano igxekwe yiNational Funeral Parlours Association, nezinkampani zabangcwabi abathe akufanele kusatshiswe ezinye izinhlanga kodwa kufanele kucotshelelwane ngolwazi ukuze wonke umuntu ahlomule.
Izolo uNgqongqoshe wezokuThuthukiswa koMnotho, ezokuVakasha nezeMvelo KwaZulu-Natal, uMnuz Sihle Zikalala uthe uzohlangana neNational Funeral Parlours Association kusasa, eDube Trade Port.
UMengameli weNafupa SA, uMnuz Muzi Hlengwa, uthe abajiki kwabakushilo ukuthi ababadingi abangcwabi bezinye izinhlanga kusuka ngenyanga ezayo.
“Asidlali ngoFebhuwari asibadingi abangcwabi bamaNdiya nabelungu. Kudala bedla emalokishini thina asikwazi ukungcwaba abelungu namaNdiya ngakho kufanele uma umuntu eshonelwe ayothatha imali yakhe aqoke umngcwabi omnyama ozomenzela umsebenzi,” kusho uHlengwa.
Amazwi akhe enanelwe nguNobhala Jikelele weNafupa SA uMnuz Nkosentsha Shezi, othe abanalo udlame kodwa babuyisa okungokwabo.
“Asilwi namuntu futhi asiphuli umthetho kuphela esikudingayo wukuthi imali yabamnyama ingene emabhizinisini abamnyama. Silungisa ukungalingani okwadalwa wubandlululo ngoba o-Avbob banamalungu angu-5.5 million kulawo malungu amaningi amnyama. Sifuna basinike umsebenzi ngoba nathi siyakwazi ukungcwaba,” kusho uShezi.
Bebuzwa ukuthi bathini ngelungelo lomthengi lokuzikhethela bathe babuyisa lona ngoba bayazi ukuthi abantu bafuna ukungcwatshwa ngabamnyama.
“Sithi mabangezi abangcwabi babelungu nabamaNdiya emalokishini nasezindaweni zasemakhaya kusukela ngoFebhuwari 1. Sibuyisa ilungelo lomthengi omnyama lokuzikhethela ukungcwatshwa ngabangcwabi abamnyama,” kusho uHlengwa.
UShezi uthe akakwazi ukuphawula ngodaba lokuthi kunabangcwabi abathole izincwadi zasenkantolo ezibavimbela ukuthi bavimbe ezinye izinkampani.
UMnuz Yongama Quma, onguMqondisi wenhlangano yabangcwabi iFederation of Funeral Professionals of South Africa (FFPSA), uthe abahambisani nokusatshiswa kwezinye izinhlanga ngoba abantu banelungelo lokuqoka abangcwabi ababathandayo.
Uthe ngaphambi kokuthi abantu bajoyine omasingcwabisane abasha kufanele bazibuze ukuthi bazolahlekelwa yini.