‘Umfowethu wabulawa ekade echela’
OWAYENGUSOMLOMO kuMasipala waseMzimkhulu, uMnuz Khaya Thobela owasocongwa ekwakhe nyakenye, wayeqeda ukuchela igceke ngesiwasho ngesikhathi edutshulwa.
Lokhu kuvezwe ngumfowabo kamufi uMnuz Nkosinathi Thobela othe umufi wabuya emsebenzini washintsha wathatha isiwasho eyochela egcekeni.
Uthe umbulali wayengaphakathi egcekeni ngabo-6 ntambama wamdubula.
“Wayechela ukuze axoshe imimoya emibi ngesikhathi edutshulwa. Unkosikazi wakhe wayesekhishini kwenzeka lesi sehlakalo, izingane zakhe zazikwenye indlu,” kusho uThobela efakaza izolo kwikhomishini kaMoerane ephenya ngokubulawa kosopolitiki KwaZulu-Natal.
Ukhombe i-ANC ngokubulawa kukamufi wathi ukubulawa kwakhe kuhlobene nengqungquthela yesifunda iHarry Gwala engakabi khona namanje.
Le ngqungquthela isihlehliswe izikhawu eziningi kulesi sifunda kanti kumele kube ngeyokukhetha ubuholi obusha.
“Asikholwa wukuthi wabulawelwa izinto ezithinta inkohlakalo ebikwayo kuMasipala waseMzimkhulu. Ukubulawa kwakhe kuhlangene nezindaba zezikhundla njengoba engomunye wabantu ababephakanyiselwe kwesikanobhala wesifunda uma sekunengqungquthela. Zimbili izinhlangothi ebezibanga, wuhlangothi olwalunoThobela bese kuba olwalunoSindiso Magaqa. Ukuhlukana kwemibono yikhona okwenza ukuthi abulawe,” kusho uThobela (Nkosinathi).
UThobela, Magaqa kanjalo noMnuz Mduduzi Tshibase, bonke ababengamakhansela kulo mkhandlu, balalelwa unyendle basocongwa.
Uthe umufi washonela esibhedlela iPort Shepstone.
UThobela uthe abeneme ngophenyo lwamaphoyisa njengoba bengatshelwa ukuthi luhamba kanjani.
“Bakhona abathathu ababoshwa ngaleli cala. Kwaboshwa inkabi kanjalo nababili, omunye wayeshayela omunye kuthiwa walanda izinhlamvu ezabulala umfowethu. Icala lagcina lichithiwe layithetha inkabi. Kuthiwa inkabi isinecala lokutholakala nesibhamu esingekho emthethweni eliqulwa eMnambithi lapho yabanjwa khona etekisini ilibangise eGoli,” kuqhuba uThobela.
Uthe akanalwazi mayelana nokuthi laba abanye abasolwa babekwa amacala okubulala umfowabo.
“Akhona namakhansela amabili esifazane ashoyo ukuthi anikwa imali yokukhokhela inkabi. Imoto okuthiwa yasetshenziswa kulokhu kubulala kuthiwa yayebiwe,” kusho uThobela.
Ohola ubufakazi kule khomishini, u-Advocate Bheki Manyathi, uthe uzohlangana nophiko lwezokushushisa athole olunye ulwazi ngaleli cala.
Omele amaphoyisa kule khomishini, u-Advocate Mthokozisi Ngcobo, uthe bazokhuluma kabanzi ngaleli cala uma sebenza izethulo ngenyanga ezayo.
UThobela uthe ngaphambi kokubulawa komfowabo kwaqale kwafakwa isithombe senja ezinkundleni zokuxhumana kwase kufakwa isithombe sekhandlela wabe esebulawa.