Uboshwe ngelokubulala obefunwa esephinda
KUBOSHWE umsolwa obevele efunwa amaphoyisa ngecala lokubulala. Kuthe izolo wazama ukudubula omunye umuntu erenki yamabhasi emakethe eThekwini.
Lo msolwa oneminyaka engu25, kuthiwa ubefuna ngenkani iziphuzo kwabanye abesilisa abebeserenki izolo ekuseni. Lesi sigameko esenzeke ngezithuba zabo-7 ekuseni kule ndawo ephithizelayo kuthiwa sishiye amalungu omphakathi ethuthumela njengoba umsolwa edubule kathathu kwangalimala muntu. Kuvela ukuthi kusize amalungu omphakathi alwe nalo mlisa, ogcine ebizelwe amaphoyisa waboshwa khona lapho.
Okhulumela amaphoyisa KwaZuluNatal uCaptain Nqobile Gwala uthe amadoda amabili abedlala isinukha, ehlisa nangeziphuzo erenki yamabhasi ngesikhathi kuqhamuka umsolwa.
“Umsolwa ufune ukuphuziswa ngenkani, abalisa ababili banqaba ukumphuzisa. Kuthe ngesikhathi laba balisa bemxosha umsolwa wakhipha isibhamu wadubula ebhekise ngakubona, kwangalimala muntu. Umsolwa uboshwe nesibhamu esingekho emthethweni okuyisona abedubula ngaso,” kuchaza uCapt Gwala.
Uthe ekwenzeni kwamaphoyisa uphenyo endaweni athole ukuthi umsolwa ubevele efunwa ngelinye icala lokubulala elenzeke ngoJanuwari 20. Kulelo cala kuthiwa kwashona uMnuz Khulekani Sigwebela (34),
USigwebela wadutshulwa ebusuku emgwaqweni uJulius Nyerere eThekwini. Kuthiwa umufi wadutshulwa umsolwa emuva kwengxabano kuphuzwa. Umufi wadubuleka esifubeni, washona esendaweni yesigameko. UCaptain Gwala uthe umsolwa uzovela maduze enkantolo ngecala lokubulala, elokuzama ukubulala nelokuphatha isibhamu esingekho emthethweni.
UKhomishana wamaPhoyisa esifundazweni uMajor-General Bheki Langa unxuse ukuthi umphakathi ungazami ukuzibambela mathupha ezigebengwini, kunalokho ubize amaphoyisa uma kunesigameko.