Isitshudeni ne-app ezosiza ukufundisa iMaths kube lula kubafundi
SIFUNA abafundi bayiphase kalula iMaths isitshudeni seComputer Science saseNyuvesi yaKwaZulu-Natal esenze i-app enemifanekiso eyenza izibalo zibe lula.
Le app ebizwa nge-Open Omnia izosiza abafundi abanenkinga ezibalweni basiqonde kangcono lesi sifundo ngokuchaza izindlela zokwenza izibalo nangezitebhisi zemifanekiso.
Umnikazi we-Open Omnia, uMnuz Lloyd Gordon (25), waseMgungundlovu, usebenza ngokuzikhandla ukuthi le app ye-internet itholakale kuma-smartphone nama-tablet ukuze ifinyelele ebantwini abaningi.
Le app etholakala ku-openomnia.com, izokwethulwa ngo-Ephreli 2018.
Umfundi uvele abhale umbuzo wesibalo bese kubuya impendulo eveza isigaba ngesigaba sempendulo. Lokhu kwenza ukuthi umfundi azi ukuthi impendulo itholakala kanjani.
Lolu hlelo lutholakala mahhala kubo bonke abafundi ngokohlelo lukahulumeni lokuguqula umnotho ngokunqala.
UGordon uthe: “Inhloso yami wukukhulisa i-Open Omnia ize yamukeleke ezingeni likazwelonke nokuthi yelekelele abafundi abaningi.”
UGordon ngomunye wabaqokiwe emingenelweni ewu-198, ulale isibili kwiNkunz’isematholeni Youth in Business Competition. Leli bhungu eliwumsunguli wezinto ligoduke nevawusha yezokukhangisa kaR50 000 ezolisiza ukukhangisa ngento yalo.
Ebuzwa ukuthi lukhona yini usizo kosomabhizinisi abancane abasafufusa, njengaye, eNingizimu Afrika, uphendule ngeqholo wathi: “Akungatshazwa, kodwa inkinga wukuthi siyintsha silindele ukuthi izinto zisheshe. Kodwa-ke izinto zithatha isikhathi kanti kufanele siqhubeke sizikhandle ngesikhathi silindele ukuthola ithuba.
“Ngibonga Ithala ngokukholelwa entweni yami nangosizo lwemali. Ngijabule ngekusasa le-Open Omnia.
“Kudala ngangizwa ngesikhungo sezentuthuko sesifundazwe esisiza osomabhizinisi abasha nabadala.”