Umlimi unqatshelwe ibheyili
UNQATSHELWE ibheyili umlimi waseCramond osolwa ngokudubula abulale ohlala epulazini lakhe bebanga ukungcwaba ilungu lomndeni.
UMnuz Edward Phillip Walter Solomon, ongumnikazi wepulazi iCraigs Farm eyingxenye ye-Otto Bluff Farm, unqatshelwe ibheyili yinkantolo yeMantshi yaseNew Hanover izolo.
USolomon usolwa ngokudubula abulale uMnuz Mothi Ngubane (42) nokuzama ukubulala uMnuz Mondli Lembede.
IMantshi, uNkk Fikile Luvuno ithe ukudedelwa kukamsolwa ngebheyili kuzophazamisa ukuthula emphakathini ohlala kuleli pulazi.
Ngaphandle kwalokho uthe azikho izizathu ezinqala ezibekwe uSolomon enkantolo ezingenza ukuthi akhululwe ngebheyili. “USolomon ukhethe ukungazikhulumeli wabhala isitatimende esifungelwe ebesifundwa ngummeli wakhe enkantolo. Kube nzima ukuthi uhlangothi loMbuso lukwazi ukumfaka imibuzo ngoba ubengazikhulumeli. Uma ufaka isicelo sebheyili kumele wena nommeli wakho nidalule wonke amacala oke wagwetshelwa wona nosawahamba kodwa uSolomon akakwenzanga lokho. Esitatimendeni sakhe uthe akakaze agwetshwe kodwa kwabuye kwavela ukuthi uke wavuma icala wakhokha inhlawulo.”
Imantshi ithe umphenyi wecala, uWarrant Officer Sibusiso Mchunu, uthe kwaphela amahora amabili ngaphambi kokuthi uSolomon azinikele emaphoyiseni ayesesemzini wakhe onamasango amathathu ahlale evaliwe.
“Inkantolo uma ithatha isinqumo iye ibheke ukuthi umsolwa uziphathe kanjani ngesikhathi eboshwa, ukuziphatha kukaSolomon ngalolu suku akugculisi. Okunye okushayisanayo ngukuthi uSolomon esitatimendeni sakhe uthe angakwazi ukukhokha u-R5 000. Uma uqhathanisa umonakalo owenzekile nale mali kufana nokuthi uthi akafuni kukhokha lutho. Ngakolunye uhlangothi ummeli wakhe, uAdvocate Brett Osborne uthe angakhokha noma yimalini.”
Uthe umseshi kuleli cala uthe uphenyo alukapheli okusho ukuthi ukukhululwa kwakhe kungenzeka kuphazamise uphenyo.