Kukhuthazwa ukusebenzisana kwi-ANC
IZAZI zepolitiki ezizimele zithi ubuholi besikhashana obubhekelele izinhlelo ze-ANC KwaZulu-Natal kufanele busebenzisane ngoba izinsuku ezingu-90 zincane kakhulu ukulungisa umonakalo odalwe wuqhekeko lwango-2015.
Ubuholi besikhashana buzoholwa nguMnuz Michael Mabuyakhulu oqokwe njengoMdidiyeli okungumsebenzi ofana nokaSihlalo. Bese umxhumanisi (Co-ordinator) kube wuMnuz Sihle Zikalala.
Amanye amalungu obuholi besikhashana be-ANC KwaZuluNatal ngoMnuz Willies Mchunu, Nkk Peggy Nkonyeni, Nkk Maggie Govender, Mnuz Super Zuma, Mnuz Mluleki Ndobe, Mnuz Cyril Xaba, Nkk Nomusa Dube-Ncube, Mnuz Nhlakanipho Ntombela, Mnuz Bheki Mtolo, Mnuz Mxolisi Kaunda, Mnuz Mdumiseni Ntuli, Nkk Nomagugu Simelane-Zulu, Nkk Bongi Moloi noNkk Makhosi Ntuli.
Isazi sepolitiki esizimele uMnuz Thabani Khumalo sithe umyalezo wobuholi bukazwelonke we-ANC uthi makusetshenziswane, yingakho kuqokwe abantu bezinhlaka ebezingaboni ngasolinye.
“Siyathemba abantu bazobuseka ubuholi besikhashana futhi kufanele buye ezifundeni ze-ANC nasemagatsheni bugqugquzele ubumbano. Ngokwami ukubona ubuholi obuqokiwe abunakho ukwenza ngokunye ngaphandle kokuthi busebenzisane ukuze umbutho uqhubekele phambili,” kusho uKhumalo.
Uthe izinyanga ezintathu zincane uma ubheka ukuthi iKwaZulu-Natal inamagatsha angaphezu kuka-700.
“Angazi ukuthi kujahweni ngezinyanga ezintathu ngoba amagatsha aKwaZulu-Natal maningi kakhulu. Kufanele abaholi baxoxisane namalungu kuzo zonke izinhlaka ukuze amalungu abuyisane ngaphambi kokuthi kube nengqungquthela,” kusho uKhumalo.
UMnuz Bukani Mngoma ongumhlaziyi wepolitiki ozimele uthe abanye bangathi uma bebuka uhlu lwabaholi abaqokiwe bazitshele ukuthi mhlawumbe lusasebenza nohlangothi oluthile njengoba kusekhona obenguSihlalo we-ANC uMnuz Sihle Zikalala, obenguNobhala uMnuz Super Zuma nabanye.
“Engikubonayo wukuthi kuqokwe abantu asebeke basebenzisana phambili futhi bonke ngabaKwaZuluNatal. Ngokwami ukubona kukhona abaholi bazo zonke izinhlaka, bazophoqeleka ukuthi basebenzisane ngoba uma bengabambisene akekho ozophumelela kubona,” kusho