Bayavutha abafundi abafuna ukubhalisa e-Unisa
KUPHAZAMISEKE ukuhamba kwezimoto ngasenyuvesi i-Unisa eThekwini izolo, abafundi bevuke umbhejazane bekhala ngokungakwazi ukuthola izidingo njengoba abasebenzi betelekile.
Isiteleka sabasebenzi singenele esontweni lesibili kule nyuvesi kulandela ukumisa nse ukusebenza ngabasebenzi befuna ukunyuselwa amaholo.
UMgcinimafa womkhandlu wezitshudeni uMnuz Nkanyiso Zwide, uthe bamise nse ukuhamba kwezimoto ngoba befuna ukusizakala.
Uthe umqashi nabasebenzi kumele bahlangane bathole isixazululo ukuze bakwazi ukuqhubeka babhalise.
“Kunabafundi abasuka kude abangakwazi ukubhalisa ngenxa yesiteleka. Enyuvesi kuthiwa ababhalise ngeinternet ngenxa yalesi siteleka kodwa abanye bayahluleka. Siyabasiza kodwa ezinye izinto zidinga abantu basenyuvesi ekubeni kungekho muntu ngenxa yesiteleka,” kusho uZwide.
Uthe nanamhlanje bayaqhubeka nombhikisho wabo ngoba bafuna ukubhalisa.
“Sifuna ukuthola nangendaba yoxhaso lwezimali, manje kume nse yonke into. Abafundi abeze nje bezobhikisha ukuze sizwakalise ilaka lethu mayelana nokuthi aseneme ngendlela izinto ezenzeka ngayo ngoba yisonto lesibili leli kutelekiwe,” kusho uZwide.
Izingxoxo phakathi kwabasebenzi kanjalo nabaphathi base-Unisa ziyaqhubeka. Akukhona kule nyuvesi kuphela okutelekiwe kuyona kodwa naseDurban University of Technology (DUT) umbhikisho ungenele esontweni lesibili.
UNksz Noxolo Memela, wezokuxhumana eDUT, uthe bazimisele ukuthola isixazululo esitelekeni.
Uthe kuneziphakamiso ezinikwe abasebenzi okuwu5.5% wokunyusa amaholo, esesibili ukunyusa amaholo ngo5.75% no-5.75% womhlomulo wokuthenga izindlu kanjalo nebhonasi.
Uqhube wathi kubuye kwaphakanyiswa nokunyusa umholo ngo-6% kanjalo nomunye u-6% wokunyusa umhlomulo wokuthenga izindlu.
Namhlanje abaphathi bale nyuvesi babize isithangami sabezindaba lapho bezocacisa khona ngezinto ezithinta isiteleka.