Bayafa yizimoto abahamba ngezinyawo
INHLANGANO ebhekele ezokuthutha i-Automobile Association of South Africa (AA) ithi ukwehla kwezingozi zangoDisemba kukhombisa ukuthi abashayeli sebeyawuhlonipha umthetho womgwaqo kodwa abahamba ngezinyawo bayaqhubeka nokubulawa yizimoto.
Esitatimendeni esithunyelwe abezindaba, abe-AA bathe njengoba uNgqongqoshe wezokuThutha kuzwelonke, uMnuz Joe Maswanganyi, ethe sehle ngo11% isibalo sabafe emgwaqweni ngoDisemba saba ngu-1 676 sisuka ku-1 875 ngo-2016
UMnuz Layton Beard wakwaAA uthe yize bekujabulela ukwehla kwesibalo sabafe ezingozini zomgaqo kodwa bakhathazekile ngokufa kwabahamba ngezinyawo abaneminyaka ephakathi kuka-25 kuya ku-34.
“Kufanele abantu abasha bafundiswe ngokuphepha emgwaqweni ngoba siyabona ukuthi bayafa abahamba ngezinyanwo. Sizoqhubeka nomkhankaso wethu iWalk Safe ohambela izikole, siphinde siqhubeke noweVisibility ogqugquzela abahamba emgwaqweni ukuthi bagqoke impahla egqamile ukuze bangashayiswa yizimoto ebusuku.”
Uveze ukuthi nezindawo ezaziwa ngezingozi zibonakala zingabanga zimbi ngamaholidi kaDisemba.
“Sidinga amaphoyisa omgwaqo amaningi ngoba nokubonakala kwawo kwenza abashayeli balandele umthetho. Enza nabathanda ukushayela bephuzile bawuyeke lo mkhuba ngoba besaba ukuboshwa,” kusho uBeard.
Udonse abantu ngendlebe ukuthi balandele imithetho yomgwaqo ukuze izingozi zingandi ngamaholidi ePhasika.