Bandile abasha ababe nezindlu
UCWANINGO lwakwaFNB lokuthengwa kwezindlu luveza ukuthi siyanda isibalo sabathenga izindlu ngokokuqala eGauteng uma kuqhathaniswa nezinye izifundazwe.
UMnuz John Loos obhekele ezokuthengwa kwezindlu kwaFNB, uveze ukuthi abathenga izindlu okokuqala bathenga kakhulu eGauteng njengoba bebone u-26% uzithenga nyakenye uma kuqhathaniswa no-2% ozithenge ngo-2014.
“Ngo-2017 sibone isibalo sabathenga izindlu siya ku-20.27% ngenxa yesimo sezomnotho. IGauteng yikuyo okuvela ukuthi imizi ithengwa kakhulu ngabantu abathenga okokuqala. Sithole isibalo sabathenge imizi okokuqala eGauteng sisuke ku-21.6% ngo2016 saya ku-25.9% ngo-2017. ETshwane ukuthengwa kwezindlu kusuke ku-23.75% kwaya ku-26.7% ngonyaka odlule,” kusho uLoos.
Uthe okwenza izindlu zithengwe kakhulu eGauteng wukubiza kahle uma ziqhathaniswa nakwezinye izifundazwe.
“Ezifundazweni ezigudle ulwandle sithole ukuthi ukuthi izindlu azithengwa kakhulu. EThekwini naseNelson Mandela Bay sithole ukuthi abathengi bebe ngu-19.6% ngo-2016 baba ngu-17% ngonyaka odlule. EThekwini bebe ngu-20.5% ngo-2016 kanti ngonyaka odlule babe ngu-14.7%,” kusho uLoos.
Uthe eCape Town abathenga izindlu ngokokuqala behle kakhulu ngenxa yokuthi imizi yakhona imba eqolo.
“Abantu abathenga izindlu okokuqala behlile eminyakeni eyisishiyagalolunye edlule eCape Town njengoba ngo-2015 babe ngu-18.39%, baba ngu12.8% ngo-2016 kwathi ngonyaka odlule baba ngu-7.5%.”
Uthe abantu abathenga imizi ngokokuqala eGauteng baneminyaka eko-36 kanti e-Eastern Cape, eThekwini naseWestern Cape abathenga imizi ngokokuqala baneminyaka eko-39.
“Esikubonile wukuthi abantu bayayithenga imizi futhi iningi lisebenzisa amabhondi okusho ukuthi linamaphepha obunikazi,” kusho uLoos.