I-ANC ayilungise eyokugodlwa kobulungu kwabanye
ISISHO sesiNgisi esingahunyushwa ngokuthi ‘uma simaqembuqembu siyowa siphele kepha uma sibumbene siyoma njalo’ kumele sibuse ebuholini nasemalungwini eqembu elibusayo i-ANC.
Uqhekeko kuleli qembu lulilimaze kabi, salibona impela liwa okhethweni lohulumeni basekhaya ngo-2016, luhlwithwa omasipala abakhulu iJohannesburg, Tshwane neNelson Mandela Bay.
Selokhu uKhongolose ubuye engqungqutheleni yokukhetha ubuholi obusha ngoDisemba, sizwa kushunyayelwa ivangeli lobubambo ufuna ukuqeda uqhekeko eqenjini.
Lolu qhekeko luze lwakha isithombe esimbi eqenjini ngokuxazulula izinkinga zalo enkantolo.
Udaba lobuholi baKwaZulu-Natal ngolunye olusenkantolo futhi olubeke kabi i-ANC, lwadala nongabazane emalungwini eqembu.
Ukuxazulula lolu daba, isigungu esiphezulu se-ANC nobuholi baso bamise ubuholi baseKZN, kwabe sekuqokwa amalungu azoba ngabaholi besikhashana abazohlela ingqungquthela yokukhetha ubuholi besifundazwe.
Ubuholi besikhashana bunamalungu alabo ababehamba noMnuz Sihle Zikalala nalabo ababehamba noMnuz Senzo Mchunu, ababebanga isikhundla sikasihlalo ngenkathi kunengqungquthela yesifundazwe ngo-2015.
Lokhu sikubona kungeminye imizamo engasiza iqembu ukubuyisa isithunzi salo emalungwini nabalandeli balo.
Ukuzwakala kwamanye alawa malungu ephawula ngokuzimisela ukubumba iqembu, kungayisiza i-ANC okhethweni lukazwelonke ngonyaka ozayo.
Lobu buholi besifundazwe besikhashana kumele bulungise ingwadla yezikhalo zokugodlwa kobulungu kwezinye izindawo.
Njengoba ingqungquthela yokukhetha ubuholi baKwaZulu-Natal ibhekwe ukuthi ibe phakathi kukaMashi no-Ephreli, sethemba ukuthi engqungqutheleni ezayo i-ANC izokwazi ukugwema amaphutha eyawenza phambilini aholela ekutheni isinqumo senkantolo ‘sihlakaze’ ubuholi.