Omakhelwane bayamemeza uma benza inkonzo yekamelo
EZOTHANDO
UMBUZO: Sihlala efulethini nonkosikazi nengane yethu eneminyaka emihlanu. Kuyindawo encane kakhulu, kangangokuthi kuyezwakala ngisho kunomsindo kwamakhelwane. Sinenkinga enkulu ngomsindo ovela komakhelwane bethu uma besenkonzweni yasekamelweni. Asimelene nokujabula kwabo kodwa inkinga bayamemeza, nomntwana wethu useqala ukusibuza imibuzo esingakwazi ukuyiphendula ngale misindo. Sesizame ukukhulumisana nabo izikhathi eziningi kodwa lutho ushintsho. Singakujabulela ukuhlala ngokuthula nathi endaweni esiyikhokhelayo.
Mzwakhe, eThekwini
Impendulo: Inzima impela le ndaba enibhekene nayo Mzwakhe. Noma kukuhle ukujabula komakhelwano bakho kodwa phela akufanele kumelane nokuthula kwenu, ikakhulukazi njengoba nengane yenu isikhulile. Sibona kungcono ukuthi nibikele abaphathi bendawo enihlala kuyona ngalolu daba manje. Lo msindo wabo ungadala inkinga enganeni yenu futhi ikhule nawo nje emqondweni wayo. Uma kungalungi nalokho, kungafanele ninqamule isivumelwano senu sokuhlala nabaphathi bendawo.
Umbuzo: Ngixakekile la, ngicela ningisize. Usisi engithandana naye usengicele ukuthi ngimshade. Ubudlelwane bethu buhle impela futhi siziphethe okwesimanjemanje. Kodwa noma kunjalo, kuseyimina indoda kulobu budlelwano. Imina okumele acele ukumshada, hhayi yena. Nginenkinga enkulu ngalolu daba, ikakhulukazi njengoba ehlale engixina ngokufuna umshado. Njengoba ehamba ememezela kuwo wonke umuntu ukuthi sizoshada, lapho abakithi abazi lutho kanti nami angikakakulungeli ukushada. Igama Ligodliwe,
eSikhaleni Impendulo : Ngokwesintu umshado uyinto ekhulunywa imindeni yenu nobabili ngoba kwakhiwa isihlobo esihle. Ngakho, menze abone ukubaluleka kwezizathu zokuthi ungakwazi ukuqhubeka namalungiselelo omshado. Kungenzeka nokuthi mhlawumbe yena ukhule umndeni wakhe ungekho empilweni yakhe okwenza angasiboni isidingo semindeni ekushadeni kwenu. Ngisho nokungakulungeli ukushada kwakho, kukhulume naye. Ungaziboni ungaphansi kwengcindezi yomshado kodwa ube ungakakulungeli. Lokho kuzokwenza ukuthi ungawuthokozeli umshado wakhoo. Udaba lokuthi uyena ocele nishade, ngeke sikwazi ukulungena. Olwenu nezinkolelo zenu. Umbuzo : Umyeni wami ungihlambalaza phambi kwabangani bakhe. Sekukuningi kakhulu asekwenzile okungenza ngizizwe ngingemuntu, ngisho sesihlezi nezingane ekhaya. Uma kufike abangani bakhe, ungithuma ngisho ukuyobathengela utshwala. Kumele futhi ngibuyile ngizobenzela ukudla.
Angigcizelele ukuthi anginankinga nokupheka, lokhu ngikuthatha njengomsebenzi wami njengomuntu wesifazane oganile.
Ukwenziwa ingane, ukwenziwa ngizizwe ngiyisigqila esingelutho, nokuhlanjalazwa esidlangalaleni izona izinkinga zami lezi. Angishadanga nabangani bakhe futhi angiyona ingane, yila sixabana khona.
Mantombi, eDundee Impendulo: Okokuqala nje, umyeni wakho ukhombisa ukungakhuli, ukungakuhloniphi, nokungakwazi ukuthi kusho ukuthini ukuba unkosikazi. Uma uluyekela lolu daba ungalukhulumi nomyeni wakho, uzophelelwa wukuzethemba. Kubalulekile ukuthi umyeni wakho azi ukuthi isenzo sakhe sikwenza uzizwe kanjani njengonkosikazi wakhe futhi sizokwenza nomonakalo kubantwana benu ngokuhamba kwesikhathi ngoba bazofunda kunina ukuthi umshado yinto enjani. Abangani abanjani bona laba ababukela umngani wabo ethuma unkosikazi utshwala futhi engakhombisi ngisho nenhlonipho kuyena? Abangani abahle bangakuvimba loku okwenziwa umyeni wakho. Umbuzo: Sineminyaka eyisithupha sishadile. Ezinyangeni ezimbili ezedlule ngithole ukuthi umyeni wami unengane enonyaka owodwa nomunye usisi. Sixabane into ongakaze uyibone ngalolu daba. Okungicika kakhulu wukuthi usola mina ngesenzo sakhe. Uthi mina bengihluleka ukuthatha indawo yami njengonkosikazi waze waphumela ngaphandle. Ngihluleka ngisho wukumbheka ngesenzo sakhe. Igama Ligodliwe,
eMadadeni
Impendulo: Ayikho neyodwa into ongayenza wena ukwenza ukuthi umyeni wakho aphumele ngaphandle. Nawe ungalinge uzithwalise ijoka lomuntu ohlulwe ukuthembeka emshadweni wakhe. Kuyinto embi nebuhlungu kakhulu le ayenzile. Okubalulekile wukuthi uyalibona yini iphutha lakhe kukho konke lokhu? Kubalulekile ukuthi nihlale phansi nabaluleki bemishado ukuze ke nilukhulume lolu daba nomuntu wesithathu. Nawe udinga usizo lokudlulisa lobu buhlungu obuzwayo. Facebook: Mo & Phindi Instagram: Mo & Phindi Email: info@moandphindi. com