UMasutha akayihloniphi inkantolo
MHLELI: Ngiyakubingelela ngenkulu inhlonipho, ngithi angizwakalise ukukhathazeka kwami ngesihluku esenziwa wuNgqongqoshe wezobuLungiswa nokuHlunyeleliswa kweziMilo, u-Advocate Michael Masutha emindenini yethu engaphakathi emajele.
Lana ngikhuluma ngabantu osekufanele badedelwe ngoshwele ngokuziphatha kahle kwabo emajele kodwa uMasutha akafuni ukubadedela, uthatha imali yethu yentela ayovikela into azi kahle ukuthi izomehlula. Lokhu usekwenze kaningi eyiswa yiziboshwa enkantolo limlahle icala kodwa akayihloniphi inkantolo, aqhubeke necala.
Imbangela eyenza uMasutha aziphathe kanje ukuthi le mali ayiphumi ephaketheni lakhe. Kade inkantolo yasho ukuthi abantu abadonsa odilikajele kusuka ngo-Okthoba 1, 2004, kuyaphansi kufanele bonke badedelwe emajele kodwa yena akafuni ukubadedela, uthi abenze amakhono, baphinde baxolise kulabo ababonayo.
Laba bantu kade badonsa. Kade zingenziwa ngani lezi zinto azidingayo uMasutha? Futhi laba bantu awukho umthetho obaphoqa ukuba mabaxolise kulabo ababonayo kodwa bayaphoqwa ukuba abavusele izitha zabo amanxeba baphume sebecijelwe imikhonto.
Uzokhumbula ukuthi yena lo Masutha ukhohlise umphakathi wathi udedela iziboshwa zezepolitiki ngoshwele kamengameli kodwa lezi ziboshwa wazikhipha ngoshwele zidonsa odilikajele, azizange zixolise kulabo ezabonayo futhi eziningi kwakungamaqabane e-ANC amanye eboshelwe ukubamba inkuzi.
Konke lokhu akwenzayo ungqongqoshe ziyakubona ezinye iziboshwa, nathi siyimindeni yazo siyakubona. Baphi laba abalwela amalungelo eziboshwa? Baphi laba abavikela amalungelo abantu? Uphi umvikeli womphakathi? Bonke bathule iziboshwa nemindeni yazo behlukunyezwa. Ngicela yonke imindeni enabantu osekufanele badedelwe emajele sihlanganise imali sikhokhele ummeli kuboshwe uMasutha namalungu ebhodi likashwele, nabo bayobhadla ejele njengemindeni yethu.
Vele kwakuwubugebengu beqembu elibusayo ukunika ungqongqoshe oyedwa iminyango emibili, babenzela ukuthi bangabopheki uma benza amacala futhi kulibaziseke inqubo yezomthetho.
Ngiyakhuza-ke ngithi uMasutha angazihlokolozi izinyoka zisemigodini ngoba zizophuma sezinolaka. Justice Mwandla