UZuma uzokwethula inkulumo yakhe yesizwe ngoFebhuwari
UMENGAMELI Jacob Zuma uzokwethula inkulumo yakhe yesizwe ngoFebhuwari futhi uzoqhubeka nokusebenza njengokujwayelekile yize kunezingxoxo eziqhubekayo phakathi kwakhe nobuholi obuphezulu be-ANC.
Lezi zindaba zivezwe nguNobhala Jikelele we-ANC uMnuz Ace Magashule obekhuluma ne-Independent Media.
UMagashule uthe uZuma uzoqhubeka nomsebenzi wakhe wokwengamela iNingizimu Afrika futhi azikho izinhlelo zokumphazamisa kulokho.
Yize eqale wangathanda ukukhuluma ngalolu daba kodwa ugcine ephendulile uma intatheli imxina ngalo mbuzo.
Ebuzwa ukuthi angaphawula athini ngezinsolo zokuthi ngeke awenze kahle umsebenzi wokuba nguNobhalala we-ANC nokuxazulula izinkinga zaseFree State naKwaZulu-Natal, uphendule wathi unguNobhala we-ANC futhi izinhlaka ze-ANC azikaze zikhale ngomsebenzi wakhe ngakho ngeke abaphendule abantu abahleba ngaye.
“Njengamanje sisebenzela ubunye bukaKhongolose futhi sizimisele ukuvuselela inhlangano nazo zonke izinhlaka,” kusho uMagashule.
Ngesonto eledlule uMengameli we-ANC uMnuz Cyril Ramaphosa uthe akufanele ahlanjalazwe uZuma futhi uhlelo lokuphuma kwakhe esikhundleni kufanele luphathwe ngobunono hhayi budlabha njengoba kwenziwa kuMnuz Thabo Mbeki. Waveza ukuthi azikho izizinda ezimbili zombuso kodwa yi-ANC ebusayo futhi bazoqhubeka nokuxoxisana noZuma ngezinhlelo zokuthi aphume kahle esikhundleni.