OweDA oncome uRamaphosa uyaziphendulela
OWAYENGUMHOLI weDA uMnuz Tony Leon uziphendulele emalungwini eDA amgxeka ngokuncoma uMengameli omusha we-ANC uMnzu Cyril Ramaphosa njengoba ethe uzoshintsha izinto.
Emhlanganweni obuseChatsworth ngoMsombuluko, uLeon uthe iDA kufanele isebenzisane noRamaphosa ngoba uzoshintsha izinto eNingizimu Afrika, wathi iDA mayigxile ekulweni nenkohlakalo. Imibono yakhe igxekwe ngumholi weDA KwaZuluNatal uMnuz Zwakele Mncwango othe yize ehlonipha umbono kaLeon kodwa akayizwa kahle eyokuthi mabeseke umholi we-ANC.
“Sinomholi wethu uMnuz Mmusi Maimane ozomela iqembu njengoMengameli okhethweni luka-2019, noma ngabe uLeon neqeqebana lakhe liyamamukela noma liyamchitha,” kusho uMncwango.
Uthe uRamaphosa ngomunye wabaholi akade bevikela uMengameli Jacob Zuma futhi ayikho into ehlukile azoyenza ngoba nohlelo lwakhe lweNew Deal alucacile.
“I-ANC iyafana ngaphansi kukaRamaphosa ngakho abantu akumele badideke. Mina ngeseka uMaimane hhayi uRamaphosa,” kugcizelela uMncwango. ULeon uthe akafuni ukungena ezindabeni zezinhlaka zeDA. “Amazwi ashiwo ngumholi weDA KwaZuluNatal ngiwathola engakufanele ukushiwo ngumuntu okulesi sikhunda.
“Uma yena nabanye abaholi beDA bengamboni uRamaphosa njengomholi ozoshintsha izinto kusho ukuthi abakufanele ukuba ngabaholi,” kusho uLeon.
Uthe iDA kufanele yeseke uRamaphosa uma enza okulungile futhi kufanele balwe naye uma engalwisani nenkohlakalo njengoba wayethembisile.
“Ngikholwa wukuthi amazwi ami ashintshwe ngabantu abafuna izikhundla zokuhola iDA KwaZulu-Natal.
“Ngingumngani kaDean Macpherson futhi uyena obengimemile ukuthi ngiyokhuluma nabantu.
“Ngeke ngizifake emdonsiswaneni wezinhlaka zeDA kodwa kukhona abafuna ukungifaka kuzona,” kusho uLeon.
Uphinde waveza ukuthi akakaze abe yilungu le-ANC futh iakazimisele ukuba yilona.
“Kufanele abaholi beDA bavuke emaqandeni babone ukuthi sekunoshintsho ezweni. Kufanele bahambisane noguquko olwenzeka ezweni ukuze iqembu lingashabalali,” kusho uLeon.
UMacpherson uthe kufanele besekwe abaholi abalwa nenkohlakalo kwipolitiki yaseNingizimu Afrika nasezinkampanini zikahulumeni.