Inhlangano yabacindezelwe ifuna abaholi behlise igebe
INHLANGANO esebenzela umphakathi emhlabeni jikelele i-Oxfam, idonse ngendlebe abaholi bamazwe omhlaba nosomabhizinisi ukuthi benze okuthile ukunciphisa igebe elikhulayo phakathi kwabaswele nabacebile.
UNkk Winnie Byanyima onguMqondisi we-Oxfam emhlabeni jikelele, utshele abaholi bamazwe omhlaba nosomabhizinisi abahambele iWorld Economic Forum eDavos, eSwitzerland ukuthi u-1% wezicebi yiwona ophethe imali.
Uveze ukuthi abantu abangu-3.7 billion yibona abaswele ukudlula wonke umuntu.
UNkk Byanyima uthe njalo ngezinsuku ezimbili kusukela ngoMashi ka-2016 kuya kuMashi ka-2017, bekuvela izicebi ezingamabillionaire ezintsha.
Uveze ukuthi isikhulu senkampani yemfashini kusithatha izinsuku ezine ukuhola umholo osetshenzelwa impilo yonke yisisebenzi esithunga izimpahla efemini yaseBangladesh.
Uthe kungadla u$2.2 billion ngonyaka ukunyusa umholo wabasebenzi abangu-2.5 million baseVietnam. Le mali uthe iyona ebiholelwa abanikazi bezinkampani ezinhlanu ezikhiqiza izimpahla ngo-2016.
“Ukwanda kwezicebi kusho ukuthi abantu abathunga izimpahla nalabo abakha amaselula, abatshala ukudla bayaxhashazwa ngoba baholelwa amakinati ukuze izinkampani zenze inzuzo,” kusho uNkk Byanyima.
Uthe abesifazane yibona abaxhashazwa kakhulu ngoba ngisho ezicebini zomhlaba eziyisishiyagalolunye kwezingu-10 zingamadoda.
“Kudala sikhuluma nabesifazane abacindezelwe emhlabeni jikelele. Abesifazane abasebenza embonini yendwangu eVietnam bahlupheka ngokudlulele.
Abakwazi nokuyovakashela izingane zabo emakhaya ngoba kufanele bakhethe ukuvakasha noma ukuthumela imali ezosiza ekhaya. Abesifazane abasebenza embonini yenyama yenkukhu e-United States bona bagqoka amanabukeni ngoba abavunyelwe ukuyozikhulula,” kusho uNkk Byanyima.
Ucele uhulumeni ukuthi asebenzisane nazo zonke izinhlaka zomphakathi ukuze kulungiswe lesi simo.
“Kufanele ohulumeni baphoqe izinkampani ukuthi ziholele abantu imali ezobasiza ukuphila njengoba kwenzeke eNigeria lapho abantu beholelwa kangcono. Kufanele kwehliswe nesibalo sezikhulu eziphezulu ukuze abasebenzi bezohola kahle,” kusho uNkk Byanyima.
Uthe kufanele kubhekwe nokuthi abesifazane bahola kangakanani bese iholo labo lilinganiswa nelamadoda enza umsebenzi ofana nowabo.
“Abacebile kufanele bakhokhe intela enkulu futhi baboshwe abayibalekelayo. Imali yabo kufanele ikhokhele imfundo nezempilo emazweni. Abantu bafuna ushintsho, bafuna abacebile bakhokhe intela, bafuna imisebenzi ebaholela kahle. Siyanicela ukuthi nishintshe isimo,” kusho uNkk Byanyima.