Kufuneka abangani nezihlobo kuphela emngcwabeni wesihlabani se-jazz
SIZOFIHLWA ngabangani nezihlobo kuphela isihlabani se-jazz, uHugh Masekela, esidlule emhlabeni ngoLwesibili ngemuva kokuphathwa umdlavuza wendlala yamadoda isikhathi eside.
Alukakhishwa usuku azofihlwa ngalo uHugh (78), obekade edume umhlaba wonke ngamanoni afana noThanayi, Stimela, Grazing In The Grass.
Esithangamini nabezindaba izolo eHollard, eKempton Park, eGoli, umfowabo kaHugh uLesetja Masekela, uthe bekuvele kuyisifiso sikamnawabo ukuthi aphelezelwe ngabasondelene naye kuphela.
Isithangami besihanjelwe nangudokotela kaHugh, uDkt Yastira Ramdas, obebambe izinyembezi ngesikhathi khulunywa ngoHugh. Bekukhona nendodana kaHugh, uSal Masekela, nabeHugh Masekela Foundation.
Ngaphambi kokuthi afihlwe uHugh kuzoba nezinkonzo zesikhumbuzo ezindaweni ezehlukene ezizobe zihambisana namadili omculo. Isikhumbuzo esikhulu sizoba se-University of Johannesburg ngeSonto.
“Umfowethu kuyisifiso sakhe ukuthi umngcwabo wakhe uhanjelwe ngabangani nezihlobo. Abezindaba namalungu omphakathi ngeke bavunyelwe. Sizamile ukucabangela wonke umuntu ngokuhlela izikhumbuzo. Ngalokho abantu bazothola ithuba lokuvalelisa kuyena. Okwamanje usuku lomngcwabo asikalubeki siwumndeni,” kusho uLesetja.
Enkonzweni ezoba ngeSonto kuthiwa kuzobe kushiyelana inkundla abaculi abacule ngokuhlanganyela noHugh kwezinye izingoma. Kuhlelwe nezinye izinkonzo naphesheya lapho khona abaculi nabalandeli bezothola khona ithuba lokuvalelisa kuBra Hugh. Nakuba umndeni ukuvezile ukuthi uhulumeni uvumile ukunika uHugh umngcwabo osezingeni kodwa awuthandanga ukwenaba.
USal uthe kuyabathoba bewumndeni ukwesekwa abakutholile kusukela kuphume izindaba zokudlula emhlabeni kukayise.
UDkt Ramdas, uncome isibindi kulesi sihlabani.
“UHugh ubeqine kakhulu ngokomqondo, ulwe kwaze kwaba sekugcineni. Ubeyisibonelo kwabaningi. Ungishiye nomyalezo wokuthi abesilisa bangazindeli uma kukhona abakuzwayo kodwa baphuthume bayohlolwa kusenethuba lokuthi umdlavuza usenganqandeka,” kusho uDkt Ramdas.