Iqulu lishise ‘owobulale’ umngani
UNGQONGQISWE ngumphakathi umuzi wowesilisa waseWelbadacht West, eChatsworth oboshelwe ukunquma umngani wakhe uqhoqhoqho, wamshumpula umphambili.
Umphakathi obudiniwe, uphuma eNkantolo yeMantshi eChatsworth izolo obekuvele kuyo umsolwa (52) obhekene necala lokubulala uMnuz Zikhule Mngoma (42), kuthiwa wehle ebhasini waqonda emzini kamsolwa wawokhela ngomlimo.
Kuthiwa amalungu omphakathi afike kulo muzi obukhiyiwe athi awasamdingi kule ndawo.
Okunye okuthiwa kubhebhezele intukuthelo ngukuthi kuke kwabonakala kuvuliwe kulo muzi kanti bekwaziwa ukuthi ukhiye wathathwa ngamaphoyisa ngemuva kokuboshwa komsolwa ngeSonto. Umsolwa kuthiwa watshela amaphoyisa ukuthi umphambili kaMngoma wawuphonsa ehlathini nommese ayewusebenzisa. Ummese watholakala kodwa umphambili awutholakalanga. Umsolwa uvele enkantolo izolo ngemuva kokuthi ngoLwesibili ecele ukumelwa ummeli wamahhala. Icala lihlehliselwe uLwesine oluzayo. Ngalolu suku kulindeleke ukuthi afake isicelo sebheyili. Umphakathi wasendaweni obuphume ngezinkani uyozwakalisa ukungahambisani nokuthi umsolwa akhululwe ngebheyili kuthiwa uthe ufuna ukuyobona lo muzi.
Kuthiwa abebesequlwini banamathisela emafasiteleni izingqwembe abebeziphethe enkantolo, wabonakala usungqongqa.
Omakhelwane bebengafuni ukukhuluma lutho ngokusha kwalo muzi ngaphandle kokuthi kufike iqulu labantu abebethi bazowubona. Akekho kubona othi ubonile ukuthi uthungelwe ngubani ngomlilo.
Omunye wabakhulume neSolezwe ongathandanga ukudalulwa, uthe: “Ngokuzwa kwami bekunokukhononda ngokuthi kungani lo muzi ubuvuliwe ekubeni amaphoyisa ayethe ukhiye awugcine kuwo ngoba umsolwa ubehlala yedwa,” kusho umakhelwane.
UMnuz Mlungisi Skhosana we-ANC endaweni ukugxekile ukushiswa komuzi, wathi uyaqonda ukuthi umphakathi udiniwe kodwa bekungamele ushiswe ngoba amaphoyisa ambophile umsolwa.
“Kusenezitho zikamufi ezingatholakali okusengenzeka ukuthi umsolwa athi uzigcine kuyo le ndlu. Abashisile bacishe ubufakazi obungasiza amaphoyisa,” kusho uSkhosana.
Uthe umuzi uke wavulwa ngoba indodakazi kamsolwa ibicele ukuthatha izimpahla zayo kodwa bebekhona abayigadile. Umsolwa kuthiwa uke wathinteka ecaleni lokunqunywa kowesifazane uqhoqhoqho, wasikwa nobuntu bakhe, eBayview khona eChatsworth. Umsolwa kuthiwa waboshwa ngaleli cala waphuma ngebheyili, wangabe esabuyela enkantolo.
Okhulumela amaphoyisa kulesi sifundazwe uCaptain Nqobile Gwala, uthe kushiswe umuzi wendoda eneminyaka ewu-52 esolwa ngokubulala enye eneminyaka ewu-42.
Uthe amaphoyisa aphenya icala lokushiswa komuzi.