Bafuna ubulungiswa abomndeni womfundi ‘obulewe’
UFUNA ubulungiswa umndeni womfundi ka-matric eMadadeni othi ushaywe kanzima amaphoyisa ngesikhathi ezomfuna kubo agcina emthathile ahamba naye watholakala eseshonile evenini yamaphoyisa.
U-Ayanda “Khehla” Tshuma (19) ushone entathakusa ngoLwesihlanu ngeledlule esiteshini saseMadadeni emuva kokulandwa ngamaphoyisa ekhaya.
Uyise omncane, uMnuz Johnson Tshuma, uthe umndeni ushaqekile futhi ufuna ubulungiswa. “Kunzima nokuba akhulume uyise nonina bale ngane ngoba amaphoyisa angqongqozile bawavulela kanti azobulala ingane yabo. Kumanje isimo sibi kakhulu kodwa esikufunayo wukuba kwenziwe ubulungiswa abantu ababulele ingane yethu ngaphandle kwesizathu baboshwe,” kusho uTshuma. Uthe yize amaphoyisa engazange asibeke isizathu sokufuna umufi kodwa manje asebatshela ukuthi ubesolakala ngokudayisa izidakamizwa.
“Amaphoyisa afike acela umfana ngegama lakhe, angena ekameleni lakhe aqala amshaya. Abazali bakhe bathe bazama ukungenelela kodwa amaphoyisa avuka indlobane abavimba. Umfana baphume naye sebemthwele ngohlaka bamfaka evenini bahamba naye bathi abazali abofika esiteshini ngakusasa (ngoMgqibelo). Emuva kwemizuzu ewu-30 kwafika amanye amaphoyisa ezolanda abazali. Bayiswa esiteshini saseMadadeni bafika batshelwa ukuthi ingane bayibone isishonile ngesikhathi bevula iveni,” kusho uTshuma.
Isolezwe lithole ukuthi umfundi waseHlalanathi High ubeshaywe kanzima wancishwa nomoya.
“Okusimangazayo wukuthi uma ubesolwa ngezidakamizwa kungani zingazange zitholakale. Kungani bengazange bambophe, kungani bembulele?” kubuza uTshuma.
Umufi kuthiwa ubengumuntu othulayo, onaka izincwadi zakhe ekhonze nokujima okufakazela ukuba yisidlakela kwakhe.
Okhulumela amaphoyisa KwaZulu-Natal, uCaptain Nqobile Gwala, uthe umufi wathathwa amaphoyisa ekhaya emuva kokuba emthole ephethe izidakamizwa.
“Kuzohlolwa isidumbu ukuze kuvele imbangela yokushona kwakhe,” kusho uCaptain Gwala.