Kushiswe nezimoto kubhikisha abamatekisi
KUNGQONGQISWE izimoto ezintathu eMgungundlovu izolo osomatekisi bebhikishela ukunyuka kwemali yamathikithi omgwaqo.
Umphakathi waseMbali, Edendale, Sweetwaters, Mpumuza nakwezinye izindawo usale dengwane amatekisi evele ama emgwaqweni, evimba bonke abadlulayo.
Lo mbhikisho uze wafika enkabeni yedolobha. Kugcine sekushiwe izimoto ezincane ezintathu. Ezinye izimoto bezishaywa ngamatshe. Abanye abagibeli abebemi ezitobhini batshelwe ukuthi babuyele emakhaya.
Isolezwe lithole ukuthi abanye osomatekisi bathe sebekhathele ukugixabezwa ngamathikithi amba eqolo noma bagwaziswe ngamaphoyisa omgwaqo. Okhulume neSolezwe wangathanda ukudalulwa, uthe sekuyacaca ukuthi amaphoyisa alwa nabo.
“Kukhushulwe imali yamathikithi omgwaqo kakhulu okwenza singakwazi ukukhokha. Amaphoyisa asehlale esicuthele. Uyamiswa noma kathathu ngosuku kungabi nankinga. Lokhu sekwenze amanye amaphoyisa omgwaqo afune ukusigwazisa ukuze sibalekele la mathikithi abizayo,” kusho lo somatekisi.
Ezinye zezikhalazo ezifakwe ezinkundleni zokuxhumana izolo bekubhalwe ukuthi amaphoyisa awangacashi akame obala, wonke amathikithi esulwe, iMeya ingahambi namaphoyisa nesokuthi bacela ukunikezwa amathikithi abazokwazi ukuwakhokhela.
UMnuz Sfiso Shangase, oyimenenja ehhovisi leSantaco KwaZulu-Natal, uthe batholile ngalesi simo.
“Engikwaziyo ukuthi amile amatekisi ngoba bekhala ngokunyuka kwamathikithi omgwaqo, lokhu kokukhala ngamaphoyisa agwazisayo, khona bekungakafiki ezindlebeni zethu. Into abakhala ngayo kakhulu ngukuthi sekubukeka amaphoyisa esebenza ngetekisi kuphela njengoba kuyiwona kuphela asemiswa emigwaqweni anikezwe amathikithi. Kumanje sizama ukukhuluma nobuholi ukuze sixazululeke lesi simo. Sithembe ezokuthutha zizobuyela esimeni,” kusho uShangase.
Okhulumela amaphoyisa esifundazweni, uCaptain Nqobile Gwala, uthe kusukela ngo-6 ekuseni izolo amaphoyisa abetshalwe eMgungundlovu abesiqaphile isimo. Okhulumela uMasipala waseMsunduzi uNksz Thobeka Mafumbatha uthe bayasigxeka isenzo sodlame kodwa bazitholile izikhalazo zosomatekisi futhi bazozibheka bese bephendula kubantu abafanele.