Ugwetshwe iminyaka eyishumi owabulala inyanga ngoKhisimusi
IGWETSHWE iminyaka engu-10 indoda yaKwaMbonambi eyabhokoda inyanga ngommese yafa kade kubhiyozelwa uKhisimusi.
Umndeni kaMnuz Mbuzeni Mngomezulu, owayeyinyanga, uthe kuvaleke ikhasi elibuhlungu ngesikhathi kugwetshwa uSiyabonga Mabonga Mbuyazi (22) waseCinci Reserve, KwaMbonambi, okuthiwa wagwaza uMngomezulu ngoDisemba 2016. Inkantolo yesifunda eSikhaleni igwebe uMbuyazi iminyaka engu-10.
Isihlobo sikaMngomezulu, owayengumakhelwane kaMbuyazi, esicele ukuthi igama laso ligodlwe ngoba sisaba, sithe namanje abaqondi ukuthi yini eyaholela ekuhlaselweni kwakhe.
“Wayefika nje ngakho kodwa ethi uzosifisela uKhisimusi omuhle ngesikhathi ehlaselwa uMabonga nabanye abafowabo. Wayehla emotweni base bemphuthuma lapho bamshaya bamgwaza. Babebathathu laba abanye babemshaya kodwa yena wamgwaza kaningi. Kuze kube manje asazi ukuthi babebangeni ngoba sasingakaze sizwe ngengxabano yabo. Into okuthiwa bayisho nje wukuthi ayife inyanga yabo. Asazi ukuthi babesho inyanga yobani,” kusho isihlobo.
UMngomezulu waphuthunyiswa esibhedlela wafike washonela khona.
Kuthiwa kuke kwanokungezwani phakathi kwabathile emndenini wakwaMngomezulu nowakwaMbuyazi ngaphambi kokuthi kwenzeke lokhu. Isihlobo sikaMngomezulu sithe abazi noma lokhu yikho yini okwakugcine kuholelele ekutheni naye agcine ehlaselwe wabulawa.
Sithe kubajabulisile ukugwetshwa kwaMbuyazi. “Umalume ubenezingane eziningi, enamakhosikazi amathathu kuphinde kube nguye obheke umndeni. Ukubulawa kwakhe kusenze sanzima isimo emndenini wakhe.”
Okhulumela amaphoyisa uCaptain Nqobile Gwala ukuqinisekisile ukuthi uMbuyazi ugwetshwe iminyaka engu10.