Samukelwe isinqumo kolukaMolefe
SAMUKELWE isinqumo seNkantolo eNkulu iNorth Gauteng sokuthi owayeyisikhulu esiphezulu e-Eskom, uMnuz Brian Molefe, akhokhe uR11 million wemali yempesheni ayithola ngesikhathi esula kule nkampani ngo-2016.
Izolo uMolefe waziswe ukuthi kumele akhokhe nezindleko zecala abelivulelwe yinyunyana iSolidarity.
UMengameli wamaJaji, u-Aubrey Ledwaba, uthe kwakungekho emthethweni ukunikezwa kukaMolefe imali yempesheni. Uthe kwakufana nento engekho ukubuyiswa kwakhe e-Eskom ngonyaka odlule ngoba akuhambisani nemigomo yezinkampani ezilawulwa nguhulumeni.
Ummeli kaMolefe, u-Adv Barry Farber, uthe isinqumo sejaji sibe nzima kubona kodwa uMolefe uyindoda ejabule futhi efuna ukusebenzela abakuleli.
Isikhulu esiphezulu seSolidarity, uMnuz Dirk Herman, sithe abakaqedi ngoMolefe ngoba basafuna ukumvulela icala lobugebengu.
UHerman uthe kunobufakazi obanele ukuthi bamvulele icala lokukhwabanisa kanti neNational Prosecuting Authority (NPA) yazise inkantolo ukuthi oKlebe bayaphenya ngalolu daba.
“UMolefe wasebenzisa inkampani yakuleli ukuze azicebise,” kusho uHerman.UDkt Mbuyiseni Ndlozi we-EFF, uthe bayasamukela isinqumo senkantolo ngoba sikhombisa ngokusobala ukuthi uMolefe wazisulela emsebenzinii.
“Lokhu kuyakhombisa ukuthi i-ANC izimisele ukumosha imali yomphakathi. UMolefe oyilungu le-ANC futhi obeyilungu lePhalamende ubezama ukuqola umbuso kodwa wabanjwa. Sibonga inkantolo ngokuba sohlangothini lwabantu baseNingizimu Afrika,” kusho uNdlozi.
UMnuz James Selfe, onguSihlalo weDA kuzwelonke uthe kunqobe abantu baseNingizimu Afrika ngesinqumo senkantolo ngoba uMolefe kwakungafanele athole impesheni.