Owe-IFP ufuna bajeze abalahla udoti wasezibhedlela ebhishi
I-IFP ifuna kujeziswe abatholakala belahla udoti wesezibhedlela osanda kutholakala olwandle eThekwini.
Ilungu lesiShayamthetho le-IFP, uNkk Ncamisile Nkwanyana lithe kufanele kuqiniswe umthetho kwabalahla udoti wasezibhedlela ukuze kuqedwe lo mkhuba.
“Izivakashi ezihambela emabhishi kufanele zikhathazeke ngoba lokhu kuyingozi. Ezweni lonke sekunenkinga enkulu yokusabalala kwezigameko zokulahlwa kukadoti (wasezibhedlela) okuyingozi kubantu, osekulethe ukukhathazeka emphakathi. Lokhu kwenzeka ekubeni kunemigomo ebekwe uhulumeni futhi kudala ingozi yokuthi kusabalale izifo, okubalwa kuzo ingculazi,” kusho uNkk Nkwanyana.
Ubekhuluma emuva kokutholakala kwalo doti okubalwa kuwo izinayiti, imijovo nokunye kwelinye lamabhishi eThekwini kuleli sonto. Udoti ubukhafulwe wulwandle ngesikhathi kunomoya.
UNkk Nkwanyana uthe abantu kufanele babambe iqhaza ekugcineni amabhishi ehlanzekile njengoba angesinye sezizathu ezenza bathande ukuvakashela eThekwini abantu bangaphandle kwaleli dolobha.
Unxuse uMnyango wezeMvelo ukuthi uphenye kabanzi ngokutholakala kwalo doti futhi uqinisekise ukuthi abathintekayo bayajeziswa.
Uthe kufanele imiphumela yophenyo nokujeziswa kwabathintekayo kulethe umyalezo ocacile kwabathintekayo kulo mkhuba ongekho emthethweni. NgoLwesibili, iMeya yeTheku uNkk Zandile Gumede ithembise ukuthi kunethimba elizophenya ngokutholakala kwezinaliti nemijovo ebhishi.