Bayavutha abafundi abafeyile uGrade 11
SISHUBILE isimo esikoleni samabanga aphezulu KwaNzimakwe ePort Shepstone, emuva kokufeyila kakhulu kwabafundi bakwaGrade 11 ngonyaka odlule, okwenze abanye babo bavuke umbhejazane, kwaboshwa omunye.
Isolezwe lithole ukuthi isimo sishube kakhulu ngoMsombuluko KwaMasosha High njengoba kuze kwabizwa amaphoyisa ngenxa yolaka lwabafundi. Izinkinga kulesi sikole kuthiwa ziqale ngoDisemba 1 kulandwa amaripoti, abekhomba ukuthi izingane eziningi zifeyilile.
Kuthiwa abanye abafundi bacekele phansi impahla yesikole becasulwa ukuthi bafeyilile. Lesi sigameko siholele ekutheni kuboshwe umfundi wakwaGrade 11, ogcine engabuyelanga esikoleni kulo nyaka.
Umndeni walo mfundi ukuqinisekisile ukuthi waboshwa kodwa uthe isikole asichazanga ukuthi uboshelweni. UNksz Minky Mbhele, oyilungu lomndeni, uvumile ukuthi uwufeyilile uGrade 11.
“Waya esikoleni ngoDisemba 1 eyolanda iripoti. Ngesikhathi bebona nabanye abafundi ukuthi bafeyilile, naye waphonsa isihlalo ngesikhathi bebhikisha. Okusixakayo ukuthi ulandwe amaphoyisa ngoDisemba 8 isigameko sesidlulile. KwakuwuLwesihlanu kufika amaphoyisa ezomlanda ekhaya, athi kukhona okumele akusayine. Saxakeka engasabuyi ekhaya, sangezwa nokuthi kwenzenjani,” kusho uNksz Mbhele.
Uthe waya kombheka enkantolo yeMantshi eRamsgate ngoMsombuluko olandelayo, wamthola khona, icala lahlehlela uJanuwari 30.
“Sesiye ngisho kubahloli bathi abalwazi lolu daba. Saya esikoleni kuvulwa izikole ngesonto eledlule, siyobuza kahle kuthishanhloko nakhona sangachazeleka,” kusho uNksz Mbhele.
Umndeni womfundi uthe uhlazekile ngalesi sigameko njengoba engasakwazi nokubuyela esikoleni. NgoMsombuluko kuthiwa kubizwe amaphoyisa ukuzolawula isimo emuva kokuba abafundi bephindiselwe emuva ngoba bengawugqokile kahle umfaniswano.
Usihlalo wesigungu esilawula isikole uMnuz Sanele Shusha, uyivumile nomhlangano kodwa wathi akuwona owezinkinga, ngojwayelekile wokuvula unyaka.
“Eyokufeyila kwabafundi ngeke ngiphawule ngayo ngoba angiyena uthisha. Engikwaziyo wukuthi sinenkinga yokungalawuleki kwabafundi, abagolozela nothisha. Bafika esikoleni sekudlule isikhathi, bangawugqoki nomfaniswano. Ngesonto eledlule batsheliwe ukuthi babuye bewugqokile kuleli sonto, yingakho bephindiselwe emuva ngoMsombuluko,” kusho uShusha.
Uthe uyazi ngesigameko sangoDisemba esingesinye sezihloko zomhlangano. Kuthiwa ngonyaka odlule u-matric wakulesi sikole uphase ngo-54%.
Okhulumela uMnyango wezeMfundo eKZN uMnuz Sihle Mlotshwa, uthe kuyabakhathaza uma kukhona isikole esiphazamisekayo noma ngabe isikhathi esingakanani. Uthe balinde umbiko ogcwele esifundeni ngezinkinga ezikulesi sikole.