Akucaci ngomsebenzi wowengane ‘eyebiwa’
ANGASE aphelelwe wumsebenzi wokuba nguthisha unina wengane ogwetshwe iminyaka emihlanu ngokuqamba amanga ngokulahleka kwengane yakhe eyayinenyanga izelwe.
Lo wesifazane ona-35 obesebenza esikoleni esiseNanda ugwetshwe le minyaka yinkantolo yaseThekwini kuleli sonto.
Okhulumela uMnyango wezeMfundo KwaZulu-Natal, uMnuz Kwazi Mthethwa uthe yize besazolubhekisisa udaba lwakhe kodwa amanye amacala asuke ebhekene nabasebenzi aholela ekupheleni komsebenzi.
“UMnyango wezeMfundo uyawuhlonipha umthetho. Njengoba sekuphume isigwebo sizobheka udaba lwakhe bese kuphuma isinqumo esibhekene nomsebenzi wakhe. Amacala awafani nezigwebo azifani. Amanye amacala aholela ekutheni ulahlekelwe wumsebenzi,” kusho uMthethwa.
Lo wesifazane uboshwe ngoMashi 12 nyakenye ngemuva kokubika ngokulahleka kwengane yakhe enenyanga athi wadunwa imoto kwathathwa nengane iphakathi.
Ngesikhathi eboshwa ubevele eselivini yokubeletha.
Wadedelwa ngebheyili, icala beliqhubeka engaphandle.
Akucaci noma ubesasebenza yini esikoleni aboshwa efundisa kusona.
Ummeli walo thisha uMnuz Mfanafuthi Biyela, weBiyela Attorneys Incorporated, uthe usazokhuluma nomndeni walo wesifazane ukuthola ukuthi icala bazolidlulisela yini kwenye inkantolo.
“Kusishaqisile ukugwetshwa kwakhe kodwa njengabantu abahlonipha umthetho siyasihlonipha isinqumo senkantolo.
Uma sesihlangene nomndeni sizobe sesazi ukuthi siyaliqhuba icala ukuliyisa kwenye inkantolo ephakeme kunalena noma cha,” kusho uBiyela.
Lo wesifazane ubondla umyeni wakhe (57), izingane zakhe ezineminyaka (15, 10, 8 nenezinyanga ezingu-11).
Ubefundisa nodadewabo esikhungweni semfundo ephakeme, okumanje kuthiwa akazi uzobuyela ngani esikoleni.
IMantshi uMnuz Anand Maharaj, ithe abezenhlalakahle kumele benze isiqiniseko ukuthi izingane zithola ikhaya elifudumele nesondlo kuhulumeni njengoba uyise nogogo wengane bethe abanawo amandla okuzinakekela izingane zalo wesifazane.
Ingane okwakubikwe ukuthi ilahlekile, ibisibuyiselwe kunina.