AbaseDUT bakhala ngokukweletwa izigidi
ABAPHATHI benyuvesi iDurban University of Technology (DUT) bathi abakwazi ukunyusela abasebenzi imali ngoba bakweletwa u-R625 million yizitshudeni.
Iphini likashansela uSolwazi Thandwa Mthembu ebelikhuluma esithangamini nabezindaba izolo, lithe nyakenye nguR220 million ongakhokhwanga yizitshudeni yize ikhona imali enguR489 million esenqolobaneni yesikhungo, izinyunyana ezithi akuthathwe kuyo njengoba inyuvesi ithi ayinayo imali.
“Siyinyuvesi edonsa kanzima ngasohlangothini lwezimali ekubeni sisohlelweni lokulungisa ingqalasizinda esindala. Njengamanje u-68% wesabelo sezimali sethu uya emaholweni abasebenzi okuyinto engavumelekile ngoba kumele ngabe siphakathi kuka-58% no-62%.”
Uthe uma benganikeza izinyunyana u-10% eziwufunayo kusho ukuthi u-72% wesabelo ungaya emaholweni.
UMnuz Wiseman Madinane, usihlalo womkhandlu wale nyuvesi, uthe kubukeka sengathi izinyunyana zabasebenzi zidonsa izinyawo ekutheni kufinyelelwe esivumelelweni.
Uthe izinyunyana zibuye ziqhamuke nokuthi azibuthembi ubuholi bukaMthembu ngoba zithi kunezinto eziningi angazilungisile selokhu engenile kulesi sikhungo. “Lokhu kuyaxaka ngoba uSolwazi Mthembu ngesikhathi engena kulesi sikhundla wabekelwa indlela ethile okumele asebenze ngayo. Nyakenye ngesikhathi sibuza ngobuholi bakhe, abasebenzi nezitshudeni bathi isabambe ngakho kodwa kuleli sonto abasebenzi sebethi ababethembi ubuholi bakhe.”
Uthe ngokubona kwakhe lincane ithemba lokuthi lezi zingxoxo zibe nokuthile eziphuma nakho.
UMnuz Milton Estrice okhulumela izinyunyana iNehawu, iTenusa neNteu, uthe izinyunyana ngeke zigudluke kwezikufunayo ngoba umqashi akafuni ukubonisana nazo ufika etafuleni evele esenento ethile angafuni ukudlula kuyona. “Uma nibonisana wonke umuntu usuke ezimisele ukuthi nizobonisana kugcine kufinyelelwe esivumelwaneni esithile manje umqashi akakwenzi lokho.”
Ebuzwa ukuthi ngabe bangasamukela yini isiphakamiso sokuthi kutholakale umxazululi ozimele, uthe kumele izinhlaka ezithintekazo zivumelane ukuthi zehlulekile ngaphambi kokuthi kube naleso siphakamiso.
“Njengamanje asikakahlali phansi sivumelane ngalokho yingakho ngithi izindaba zethu kumele zilungiswe yithi ngaphambi kokufuna umuntu wangaphandle,” kusho u-Estrice.