I-ANC ayinike abantu izikhundla ngezicucu hhayi ngobubhululu
MHLELI: Sekukaningi singabahlali bakuleli lengabade sikhala ngezinto ezingumthelela ekufeni kwezwe lethu kwezobuholi. Ukufakwa kwabantu abangenalwazi lwalowo mkhakha, ngokunye. Sihlale sikubika ezinhlakeni zenhlangano ebusayo singamagatsha kodwa ivele ithalalise ingenzi lutho.
Ngiyafisa ubaba uCyril Ramaphosa nethimba lakhe baluleke izinhlaka ze-ANC ukuba zilalele amagatsha ngoba yiwona awumgogodla wokuwina kwenhlangano.
Ngike ngalandela udaba oluyinzukazikeyi lwaseLife Esidimeni lobudedengu kuze kushone abantu abangu-143.
Uma ubheka nje inkinga yasuswa yinhloko yoMnyango wezeMpilo okwakuNkk Qedani Mahlangu.
Ngizokhomba nesigungu saseGauteng ngokukhetha uNkk Mahlangu ukuba ngungqongqoshe wezempilo eGauteng ekubeni engenaso ngisho isicucu esincane kwezempilo njengeHome Based Care noma esobuhlengikazi.
Uma ubheka nje konke ngemfundo yakhe uyathola ukuthi ubengafakwa kwezemfundo noma kwezokuphatha abe yinhloko yomanyango.
Mhlawumbe ngabe leliya hlazo alenzekanga ukube inhlangano ebusayo ibheka ukuthi unani, ungakufanela yini lo mnyango ngokwezicucu zakho.
Uyabona, ukube uNkk Mahlangu (osesithombeni) wake waba umhlengikazi noma udokotela wabe esenikwa esokuhola umnyango, ngabe alenzekanga leli hlazo.
Ngiyacela inhlangano ebusayo inike abantu abanolwazi lomsebenzi, iyeke ukunikana ngobubhululu imisebenzi. Lokho kulimaza umnotho wezwe.
Buka nje kwenzakalani ebuholini obebuholwa uMengameli JZ, kunamakhomishini amaningi obudedengu beminyango, okuyizinkomba zokuthi bekusebenza itiye ukuze umengameli afeze inhloso zakhe.
Uma ngikukhela nje phezulu mfundi weSolezwe udaba lukaNkk Bathabile Dlamini ngenkontileka yakwaCash Paymaster (CPS) okumanje uphekwa ngemibuzo. Angeke ngimangale uma yonke inkinga akuyo kungenxa kaZuma obeshayela isitimela eyedwa, ukuze kufezeke inhloso zakhe.
Asethembe ukuthi uCR uzosibuyisa isithunzi senhlangano esehliswe yizinsolo zokuthi ikhohlakele inhlangano i-ANC.
Okunye uCR okumele akwenze wukunika abantu umsebenzi ngokwezicucu noma isipiliyoni bese ehlaba ikhwelo ezinhlakeni ekutheni azilalele amagatsha ukuze kugwemeke amahlazo. Khabzela Mzimela EZWELIBOMVU