NguSun-EL obhale ingoma yodumo
KANAMALI kodwa uthanda yonke, yonke into engiyiyo.” Sikwethulela insizwa engumnikazi wale ngoma uSanele “Sun-EL” Sithole (29), waseMooi River kodwa manje osezinze eGoli.
AAbantu abaningi le ngoma babecabanga ukuthi ngekaSamthing Soweto, okunguye ocula phambili kuyo.
Ngibone kungcono kuleli sonto ke ngithinte le nsizwa, ngizwe ngokungena kwayo endimeni yomculo njengoba kubukeka sengathi le ngoma iyivulele iminyango eminingi. Le ngoma isizwakala ngisho ezikhangisweni zezinkampani ezinkulu kuleli.
Ube ngumuntu engisheshe ngamthola futhi wangitshela ukuthi ukuphuma emaphepheni azinze KwaZulu-Natal ubekufisa kakhulu.
“Ngizalwa eMooi River, ngakhula khona. Ngikhuliswa ugogo. Umama washona ngisemncane ngineminyaka engu-8 kodwa ubaba yena ushone sengikhulile,” kusho uSun-EL.
Uthe ufunde eNottingham Combined, waze waqeda khona u-matric ngo-2005.
“Ngemuva kokuqeda ugogo wangitshela ukuthi kumele ngiqhubeke nokufunda. Ngathola isikhala sokufunda eNyuvesi yaKwaZulu-Natal ngo-2007, ekhempasini yaseMgungundlovu.
Inkinga ngaze ngabhalisa ngingazi ukuthi ngizokwenza ziphi izifundo. Abangani bami bangitshela ukuthi kungcono ngithathe izifundo ezithinta umkhakha wesayensi njengoba ngangiyiphase kahle iMaths neScience. Nangempela ngakwenza lokho kodwa emqondweni wami kukhona ukuthi ngenza into engingayithandi,” kuchaza uSun-EL.
Uthe esikoleni kwakunomcimbi lapho kwakuvakashe oDJ abahlukene. Ekuqhubekeni komcimbi ematasa edansa wabona ukuthi umculo yiyona into ayithandayo.
“Umqondo wami wangitshela ngaso leso sikhathi ukuthi umculo yinto okumele ngiyenze.
Ngaphasa kahle ekupheleni konyaka nokulapho ngahlala khona phansi nogogo ngamtshela ukuthi angisabuyeli esikoleni, okungamphathanga kahle lokho njengoba angithethisa kakhulu,” kusho uSun-EL.
Uthe ngemuva kwalokho waqala ukwenza izingoma, enza nemicimbi ngakubo futhi kumjabulisa ukubona abantu bezithokozela.
“Ngasekhaya bangitshela ukuthi kumele ngihlangane noDemor, yize ngangingazi ukuthi owangakithi.
Efikile ngaya kuye ngamnikeza iCD yami. Ngathola ucingo lwakhe engibuza ukuthi ngempela yimina yini engibhale izingoma engamnika zona.
Wawuncoma umsebezi wami futhi wangisayina ngaphansi kwenkampani yakhe iDemor Music,” kuchaza uSun-EL.
Uthe waqala wasebenza noBucie ezingomeni zakhe okukhona kuyo ethi Induku, Shela nekaDemor ethi Cliché.
“Ngemuva kwaleyo ngoma ngaqala ukubhala ezami ukuze ngikhiphe i-albhamu. Ngo-2016 kula ngabhala khona izingoma okukhona kuzo le ethi Akanamali. Kuthe ngoMeyi ngonyaka odlule ngakhetha ukuyikhipha.
Kwangijabulisa futhi kwangithusa ukubona abantu beyithokozela. Kodwa mina
angifuni ukuqamba amanga, ngangingayizwa kahle,” kuchaza yena. Uthe wayengayithembi le ngoma ukuthi izothandwa kakhulu yize sisetshenziswa ezikhangisweni zezinkampani ezinkulu ezahlukene kuleli. “Ngiyafisa ukuthi ngabe ugogo usekhona abone ukuthi emculweni kuhamba kahle kanjani manje njengoba eshone ngonyaka odlule ngoNovemba,” kubalisa uSun-EL. Lo mculi ubonga kubantu bakuleli ngokumkhombisa uthando ngengoma yakhe yokuqala. “Ngiyazalwa ngoMashi 28. Ngalolo suku ngizokhipha i-albhamu yami ethi Africa To The World, engiyikhiphe ngaphansi kwenkampani yokuqopha i-EL World Music. Kodwa ngizoqale ngikhiphe ingoma kuleli sonto elizoqala,” eveza ezintsha uSunEL. Maduze nje uthe uzohambela amadolobha KwaZulu-Natal, okukhona kuwo iDundee, Newcastle neTheku ebonga abalandeli bakhe. “Endimeni yomculo bengifisa ukusebenza neSoul Brothers kodwa ukubona amalungu ayo edlula emhlabeni kunciphise amathuba ami okwenza umculo naleli qembu. Baningi abanye engifisa ukusebenza nabo, ngisho intokazi yaseThekwini uShekhinah noLady Zamah ngiyafisa ukusebenza nabo,” kuchaza yena. Uma ezihlalele ekhaya uSunEL uthe uthanda ukubuka amafilimu, ikakhulukazi othando. “Noma ngingeke ngiveze ukuthi ukhona yini umuntu engibambisene naye kwezothando kodwa uthando yinto enhle. Uma ngingabuki amafilimu ngithanda ukubuka izinhlelo zezindaba ukuze ngazi ukuthi kwenzakalani ezweni,” kuchaza yena. Uthe uyawuthanda kakhulu umculo weminyaka yama-80s njengoba uyise wayejwayele ukuwudlala. Uthe kunina bahlanu, abafana abathathu namantombazane amabili, yena ungowesine. Ibhola uthe akalilandeli njengoba lamphuma kudala kodwa uyalithanda iqembu iKaizer Chiefs. USun-EL uthe uyazifela ngenyama yenkukhu nojeqe.