Usale emangele uMusa yithalente eThekwini
NOKUBONGWA PHENYANE UMUSA Sukwene owadla umhlanganiso ohlelweni amaIdols ngo-2013, uthi akakuhaleli ukuba yijaji ngokugcwele kulolu hlelo njengoba kungumsebenzi onzima.
UMusa ukusho lokhu enkulumeni ekhethekile abe nayo neSolezwe ngesikhathi kuqhubeka inhlolokhono yalolu hlelo eThekwini, eLangeni Hotel, ngoLwesithathu.
Le nsizwa yaseMpumalanga ithe, ikuthandile ukunikwa ithuba lokuba yijaji kodwa kube wumsebenzi ongelula.
“Ngibe nesikhathi esimnandi futhi kukhona engikufundile ngokunikwa leli thuba. Uma bethi angiphinde ngizobasiza, ngingavumela phezulu kodwa ngeke ngiwenze ngokugcwele lo msebenzi. Ngibonga kakhulu njengoba ngangingacabangi ukuthi nami ngiyoba kulesi sihlalo ngesikhathi ngifika ngizokwenza inhlolokhono ngo2013,” kusho uMusa.
Uthe ukujaja akuyona into elula, ngisho umuntu ubezama kanjani ukuzimisela kodwa uma embona ukuthi akakulungele ukudlulela esigabeni esilandelayo, ubemtshela ngqo.
“Ngibonile ukuthi yini eyenza amajaji athi yebo noma cha, ithalente likhona eThekwini, engikubonile kungimangazile,” kuchaza yena.
Isolezwe lifike kule nhlolokhono ngehora lokuqala kodwa abese ngaphezu kuka-10 amathikithi akade esekhishiwe.
Intsha ibiphume ngobuningi bayo futhi eningi ikhombise ithalente elisiyisimanga.
UBulelwa Nontlanga ungomunye wabathole ithikithi elimdlulisela esigabeni esilandelayo.
Le ntokazi idonse amehlo amajaji nayincomile ngendlela ecula ngayo.
Ngisho abazokwenza lolu hlelo luhehe, abeza kulo ngenjongo yokuncokola abasalanga ngaphandle.
Kubukeka u-Excellent Masoka ezothandwa yiningi njengoba namajaji ahlabeke umxhwele ngesikhathi ecula ingoma yeSoul Brothers ethi Mama.
USomizi uze wasukuma wayocula nale nsizwa obekubonakala ukuthi izimisele ngale nto eyenzayo kodwa ayizile kulolu hlelo ngethemba lokuthola ithikithi kodwa izojabulisa ababukeli balo uma selukhonjiswa.
USomizi uze washo wathi u-Excellent usivalile isikhala sikaBishop waseMzimkhulu owadla umhlanganiso ngo-2016, emkhakheni weWooden Mic.