Owegqubu phakathi kweKings noThongathi
UMGADLI weReal Kings uPhumelele “Ace” Bhengu usalubambele igqubu Uthongathi FC abazobhekana nalo emdlalweni weNational First Division (NFD) obhekwe ngabomvu kusasa ngo-3.30 ntambama ePrincess Magogo Stadium, KwaMashu.
Emzuliswaneni wokuqala Uthongathi lwamangaza abaningi luqumba phansi iKings ngo 2-0. Uthongathi olusanda kufika kwiNFD luhambela phezulu ngemuva kokuthela othulini iJomo Cosmos ngo 1-0 ngesonto eledlule eMagogo.
I-Kings ngakolunye uhlangothi isefomini selokhu kuqale unyaka. Iguqise iCosmos ngo 1-0 yadlala ngokulingana ngo 1-1 neHighlands Park ehlezi esicongweni kwathi ngeledlule yatalabha iSuper Eagles ngo 3-1 ekhaya.
Umakadebona womgadli weKings uBhengu utshele Isolezwe ukuthi abakhohliwe okwenziwa Uthongathi behlangene emzuliswaneni wokuqala.
“Into emqoka kithina wukubhekana nomdlalo owodwa ngesikhathi. Abakwenza kithina kubuka izwe lonke kwithelevishini sisakukhumbula. Kulokhu kufanele kukhale esethu isichathulo. Ngeke kube lula kodwa sifuna ukugcina umgqigqo wethu omuhle wokuqoqa amaphuzu,” kusho uBhengu.
I-Kings isendaweni yesibili kwi-log yeNFD ngamaphuzu angu-31 emidlalweni engu-18. Leli qembu lihlukaniswe amaphuzu ayisithupha neHighlands Park eqhwakele kwi-log.
“Ukuhlala endaweni yesibili kwi-log kuyasigqugquzela. Iqembu lethu lisha futhi lisafuna ukuzakhela igama. Konke kubukeka kuza kahle. Asizimisele ngokugxila kwiHighlands ephezulu. Thina sifuna ukuqoqa amaphuzu kuze kuphele isizini, emuva kwalokho siyobe sesibona-ke ukuthi amaphuzu ebesiwaqoqa asibeke kuphi. Thina sibhekana nomdlalo ngamunye ngaphandle kokuzifakela ingcindezi,” kusho uBhengu.
Uthongathi luhlezi endaweni ka-11 kwi-log ngamaphuzu angu-20 ngemuva kwemidlalo engu-18.