Umqansa ohlalele iBasetsana ezohloma ihlasele eNigeria
KUBUKEKA kuzofana nokuqwala intaba ukuthi iqembu laseNingizimu Afrika lamantombazane lika-Under 20 libuye nomphumela ozolifaka kwiNdebe yoMhlaba njengoba lizothuthana neNigeria emlenzeni wesibili emdlalweni wokuhlunga.
Okwenza kubonakale kusinda kwehlela kwiBasetsana ukuthi ingashayela iNigeria esibayeni sayo wukuthi iya emdlalweni ivele ilandela emuva ngo 2-0.
Umdlalo ukusasa eSamuel Ogbemudia Stadium, eBenin City.
Elakuleli lishayelwe ekhaya emasontweni amabili edlule nokuwumphumela onciphisa amathuba okuya kwiNdebe yoMhlaba eseFrance ngo-Agasti.
Iqembu lakuleli lika-Under 20 alikaze lilubhade kulo mqhudelwano kanti nakodlule lavinjwa yiNigeria emzuliswaneni wokugcina wokuhlunga.
Ukaputeni, uLinda Mathlalo, uthembise ukuthi bazofela enkundleni.
“Siya kulo mdlalo kungekho okubhekiwe kithina, okusho ukuthi asinayo ingcindezi. Okwethu wukuthi sidlale ngakho konke esinakho enkundleni, senze konke umqeqeshi azositshela kona,” kusho uMathlalo kwiwebsite yeSafa.Ngemuva kokwehlulwa emlenzeni wokuqala umqeqeshi, uMaud Khumalo, akayivumanga eyokuthi kungenxa yokuthi amaFalconets ayephethe umdlalo.
“Thina silinyazwe ukungabi bahle uma sesifike phambi kwamapali. Ngokubona kwami abazange basicindezele ngomdlalo,” kusho uKhumalo.
Amagoli emlenzeni wokuqala angena esiwombeni sokuqala, amaFaloconets ase ezihlalela emuva kwesesibili. Nokho lokhu akuchazi ukuthi noma esedlalela ekhaya azopaka ibhasi. Kungenzeka afune ukushayelela isipikili sokugcina ukuze asheshe aqede ngeBasetsana.
Elakuleli lidinga ukushaya amagoli amabili ukuphoqa umdlalo uye kumaphenathi noma ishaye amathathu angeke aphendulwe ukuze iye eFrance.
Iqembu likaKhumalo akusilona lodwa elilwela ukuya kwiNdebe yoMhlaba. Ngesonto elizayo uyaqala umshikashika eqenjini lamantombazane lika-Under 17 eselisalelwe ukubhekana neMorocco emilenzeni emibili ukuze liye emqhudelwaneni ose-Uruguay ngoNovemba.