‘Mayingabi yihaba eyami noBrockie’
UNOZINTI weKaizer Chiefs, u-Itumeleng Khune, uzivala ngayo yonke indlela izinkulumo zokuthi umdlalo wezakhe neMamelodi Sundowns ungase uphenduke impi phakathi kwakhe nomgadli omusha wamaBrazilians, uJeremy Brockie, ojwayele ukumhlupha.
I-Kaizer Chiefs izogadulisana neMamelodi Sundowns emdlalweni we-Absa Premiership eFNB Stadium, eNasrec, kusasa ngo 8.15 ebusuku.
IChiefs esendaweni yesithathu kwi-log, ayikehlulwa emidlalweni emithathu kwi-ligi ilandelana. ISundowns, eshiya Amakhosi ngamaphuzu ayisihlanu, isibhaxu isithole kwiPolokwane City nakwiOrlando Pirates nokuphazamise izinhlelo zomqeqeshi uPitso Mosimame emasontweni edlule.
Nakuba umdlalo weChiefs neSundowns ubhekwe ngabomvu ngenxa yokuthi uhlala ushubile kodwa kungenzeka ukuthi ukufika kukaBrockie kwengeze okuthize. Umbango wakhe noKhune kungenzeka ukuthi kugcine kukhulunywa ngawo ngendlela efanayo nowawuphakathi kukaBrian Baloyi owayevimbela iChiefs noJerry Sikhosana owayengumgadli wePirates.
Umbango kaKhune noBrockie waseNew Zealand, osayine kwiSundowns emasontweni ambalwa adlule esuka kwiSuperSport United, uyaziwa ebholeni laseNingizimu Afrika. UBrockie uyena oshayele iSuperSport igoli kuvimbe uKhune ngesikhathi bekhipha Amakhosi kwiMTN 8 kule sizini.
Emdlalweni wakamuva iSundowns ixebula iPlatinum Stars uBrockie ungene esiwombeni sesibili esuka ebhentshini nokuyizinkomba zokuthi umqeqeshi uMosimane ubemlungiselela umdlalo omkhulukazi neChiefs kusasa. Ngasekupheleni konyaka odlule uKhune ufake kwiTwitter i-video yakhe evimba ibhola elalithunyelwe nguBrockie ophendule ngokubuza lo nozinti ukuthi kungani engayifaki eyakhe (uBrockie) eshaya igoli kuyena.
Esithangamini nabezindaba ngoLwesithathu eGoli, uKhune uthe ayingathathwa ngehaba indaba yakhe noBrockie.
“Kuyinhloso yawo wonke unozinti ukungangenelwa yigoli. Angithandi ukungenelwa yigoli ngisho ejimini. Mina ngeke ngikubize ngombango kangako okuphakathi kwami noBrockie. IChiefs izobe idlala neSundowns ngalobo busuku,” kusho uKhune. Ujike wantela wathi: “Ngizoba nabadlali basemuva abazobhekana noBrockie. Ngizohlala ngibatshela ukuthi uBrockie ungakuphi ukuze ngingabi nalo ibhola okufanele ngilivimbe.” UMosimane, okusukela kuqale isonto ezama ngakho konke ukudlala ngomqondo womqeqeshi weChiefs, uSteve Komphela, utshele uKhune ukuthi akakhululeke ngoba kungenzeka angamdlalisi uBrockie.
“Yebo sidlala neqembu elingenelwe amagoli ambalwa kunathi (11). Kodwa ngiqoka ukubheka kolunye uhlangothi. Sihlasela kakhulu, lokho kuyiqiniso. Sizoyihlonipha iChiefs, yenza kahle kakhulu. Ngicabanga ukuthi Itu ungakhululeka, uBrockie kungenzeka angawuqali umdlalo. Asimlethelanga ukuthi azosiwinisa uma sibhekene neChiefs. Futhi asimlethelanga kwiSundowns uBrockie ukuthi azosibeka esicongweni se-log, usifice khona. UBrockie uzosisiza kwiCAF Champions League,” kusho uMosimane.