Sidinga ukuqoqa amaphuzu noma ngabe sibhekene nobani: Karuru
ISIKHWISHIKHWISHI somdlali waMaZulu, u-Ovidy Karuru, sifuna iqembu liyeke umkhuba omubi wokwenyusa kakhulu izinga uma libhekene namaqembu adume ngokuba sembangweni wezicoco.
Usuthu lukhuze ibuya kwi-Absa Premiership ekuqaleni kwesizini. Luthenge isitifiketi seThanda Royal Zulu ebe ngompetha beNational First Division (NFD) ngesizini edlule.
Njengamanje Usuthu luhlezi endaweni ka-13 kwi-log ye-Absa Premiership ngamaphuzu awu-19 ngemuva kwemidlalo ewu-17. Kusasa ngo-3.30 ntambama Usuthu luzoshukana nePolokwane City e-Old Peter Mokaba Stadium, ePolokwane, eLimpopo.
UKaruru ufuna iqembu lakhe liyeke umkhuba wokuqoqa amaphuzu agcwele uma libhekene namaqembu amakhulu kuphela. Kule sizini ka-20117/18, Usuthu selunqobe imidlalo emine.
Luthele othulini ompetha beligi iBidvest Wits, iMamelodi Sundowns engompetha beCAF Champions League neSuperSport United efinyelele kowamanqamu weCAF Confederation Cup ngonyaka odlule.
Enye iwini yoSuthu iqhamuke emdlalweni wokuqala weligi luqumba phansi iFree State Stars ngo 2-1 eKing Zwelithini Stadium, eMlaza. Lidlale ngokulingana ngo 0-0 libhekene neKaizer Chiefs lase libambana ngo 1-1 ne-Orlando Pirates.
“Inkinga esibhekene nayo ehlasela wonke amaqembu. Emidlalweni emikhulu bonke abantu basuke befuna ukuzibonakalisa. Iningi labadlali lisuke lazi ukuthi amehlo amaningi asuke ethe njo emidlalwnei emikhulu. Kulesi simo esikusona njengamanje sidinga ukuqoqa amaphuzu noma kungathiwa sibhekene nobani. Sidinga amaphuzu emaqenjini amancane namakhulu. Yonke imidlalo kithina isifana nemikhulu manje. Amaphuzu siyawadinga ukuze sihlale kwiPSL,” kusho uKaruru.
Usuthu luhlukaniswe amaphuzu amane nePlatinum Stars ehlezi ekugcineni.
“KwiPolokwane City sizoya sinomqondo owodwa wokuyolwa ukuze siqoqe amaphuzu amathathu. Uma sizolwa ngendlela esilwe ngayo kule midlalo emibili edlule angingabazi ukuthi kukhona esizobuya nakho,” kusho uKaruru.