Injini kadizili eyongayo

SEKWENGEZWE injini kadizili eyongayo kwiPeugeot 3008 SUV eqale ukutholakala emagaraji akuleli ngonyaka odlule. Phambilini le moto engenye yezibanga isicoco semoto yonyaka emncintiswaneni i-2018 WesBank Car of the Year, ibitholakala ngenjini kaphethroli kuphela. Izinhlobo ze-3008 Active ne-Allure sezitholakala ngenjini engu-1.6 THP Auto ne-2.0 litre HDi. I-3008 Active 2.0 HDi ino gearbox oshintshwayo oyisix-speed manual kanti ezinye izinhlobo zona zishaya ngomshini ozishintshayo. Le njini engu-2.0 HDi 4 cylinder iqoqene, ilula ngokwesindo futhi iyonga kudizili ngenxa yokungasindi kwayo nosayizi. Ikwazi ukukhiqiza amandla angu110 kW netorque engu-370 Nm. Ikwazi ukukhipha ijubane elifinyelela ku-201 km/h. Njengoba kuthiwa iyonga nje, bathi ngebanga lika-100km isebenzisa amalitha angu-5.0 kadizili. IPeugeot 3008 SUV ngonyaka odlule yadla umhlanganiso emiklomelweni yeDrive 360, okoyinkonyane lezezimoto eliphuma emaphephandabeni asesitebeleni esisodwa neSolezwe, emunxeni weFamily Car of the Year. Izinto egabe ngazo kubalwa kuzo ubuhle bayo kanjalo nengwaba yobuchwepheshe. Ubuchwepheshe bezokuphepha buhlanganisa i-Active Safety Brake neDistance Alert esiza ekutheni izibambe yona amabhreki uma ibona ukuthi ingase ishayise ngaphambili, ine-lane departure warning system ekubikela uma uphuma emzileni ngaphandle kokushaya i-indicator futhi kukhona neDriver Alert Warning eqaphelayo uma umshayeli esekhathele bese ikhipha isixwayiso sokuthi kumele athi ukuhlaba ikhefu.