Amabhande anganciphisa izingozi
NJENGOBA izingane sezibuyele esikoleni, kuphinde kwagqama ukubaluleka ukuzigada emotweni. Emazweni amaningi izingozi ziholela ekutheni kushone abantu abasha abaphakathi kweminyaka emihlanu kuya ku-24. Ukusetshenziswa kwamabhande asezihlalweni kungazinciphisa kakhulu lezi zibalo. Emhlabeni jikelele kuqagelwa ukuthi ibhande lingasiphisa amathuba okufa ngo45%. Ukwazi ukufasa ibhande yinto abshayeli abaningi nabagibeli abayithatha kancane. Lokho kwenza kungathusi ukuzwa ukuthi izingane eziningi azigcini kuphela ngokungalifasi ibhande kodwa azikwazi nakwazi ukulifasa. Emcimbini wakamuva lapho khona iMasterDrive ikhulume khona nabafundi bamabanga aphansi, abaqeqeshi bakuqaphele ukuthi uma izingane kufanele zifase ibhande, iningi alikazi. Baqagele ukuthi ezilinganiselwa ku-70% bezidinga usizo lokufasa. Umphathi weMasterDrive u-Eugene Herbert, uthe lokhu kuyakhathaza. “Kumele izingane ziqwashiswe ukuthi kumele zifase ibhande ngaso sonke isikhathi. Ngisho ngabe abazali abanazo izimoto kodwa izingane ngesinye isikhathi ziba abagibeli. Njengomgibeli, yonke ingane inelungelo lokuba nesihlalo nebhande lokho okusho ulwazi lokufasa ibhande. Nginxusa wonke umzali ukuthi aqinisekise ukuthi yonke ingane inalo lolu lwazi.” Uthe abazali kumele babe nesiqiniseko sokuthi ingane ivikeleke ngendlela emotweni uma kuba nengozi. “Kubalulekile ukuthi kube sezandleni zomzali ukuqinisekisa lokho ngoba kwezinye izikhawu, umthetho awubeseki.” Uthe lokhu kufakazelwa yisigaba 231 seNational Road Traffic Act esichaza isibalo sezingane ezingaba semotweni: - Ingane eneminyaka engaphansi kwemithathu ayibalwa - Izingane ezimbili ezineminyaka ephakathi kwemithathu kuya kweyisithupha zibalwa njengomuntu oyedwa. - Izingane ezintathu ezineminyaka ephakathi kweyisithupha kuya kwengu-13 zibalwa njengabantu ababili. Uthe uma abantu bengalandela lo mthetho kuyenzeka ukuthi yonke ingane ibe nesihlalo sayo kanjalo nebhande layo. “Uma ungakaze uyifundise ingane yakho ukufasa ibhande siyakuqgugquzela ukuthi uye ekhaya namhlanje uyokwenza. Ikusasa eliphephile neliqhakazile lengane yakho lingancika kulo.” Uthe kungcono ukuthi izingane ezineminyaka ephansi kuka-12 noma ezingaphansi kuka-150 cm zihlale ngemuva esihlalweni esinesisekelo. Ingezansi lebhande kumele lihambe enqulwini hhayi esiswini. Uthe ibhande lasehlombe lihlala esifubeni nalwi-collarbone lingathinti ubuso nentamo. Ungalokothi ubeke ibande lasehlombe ngemuva kwakho noma ngaphansi kwengalo