Uzoklwebha eleMazda uDJ Happy Gal
USEYINXUSA lezimoto zenkampani iCMH Mazda Umhlanga, uDJ Happy Gal oyisilomo sikaDJ waKwaZulu-Natal. UHappy Gal akasagcini ngokwaziwa ngokuklwebha amapleti emicimbini uma esenza umsebenzi wakhe njengoba manje eseklwebha nethayi lezimoto zakwaMazda.
Lokhu kuqinisekiswe umdayisi omkhulu walezi zimoto uLindani Mwehle.
ULindani uthe banike uHappy Gal imoto yabo ngoba bethembe ukuthola umphumela omuhle ngaye.
“Siwabonile amagalelo alo DJ sase sibona kunguyena ongasinika imiphumela emihle ngokuhamba ngemoto yethu,” kubeka uLindani.
NgokukaLindani lolu hlobo lweMazda 2 Skyactive Technology 2.5 litre ka-2015 oselushayelwa uHappy Gal, bazothola amakhasimende amaningi angabalandeli bale ntokazi.
“UHappy Gal uhamba izindawo eziningi ngale moto, abaningi sebeyibonile ngoba bayasishayela nezingcingo. Usenze le moto ebinganakiwe bayithakasela abaningi,” kuphetha uLindani.
UHappy Gal ephawula ngale moto uthe ungathi uqala ukushayela imoto yesitayela sakhe ngalena.
Uthe kuningi akufundile ngokuba yinxusa nangokushayela lolu hlobo lwemoto kwayena abengalunakile.
“Izimoto zakwaMazda ziwumkhiqizo omdala, bengingazinakile kodwa manje lena engihamba ngayo ingifaka ezintweni ngoba isesitayeleni,” kuphawula uHappy Gal.
Uqhube wathi le moto ilungele lonke uhlobo lomuntu futhi ayichemi ngeminyaka.
Okutholakala kuyo yi-air conditioner, amawindi kagesi, intofontofo, amalambu enkungu, ABS break, Bluetooth yokuxhuma i-cellphone, umsakazo osezingeni okhandelwe ngaphakathi nokunye okuningi.
Okubuye kwavela ngayo ukuthi iyawonga uphethroli ngoba igcwala ngoR600 koluhlaza kodwa uhamba uze ukhohlwe, injalo nje iyazimelela emgwaqweni okusho ukuthi amajika nezintaba ayizizwa ihamba sengathi umgwaqo oqondile.