Ifilimu Inxeba iyisilonda kwabaningi
AYANDA amabhayisikobho avala ukubukwa kwefilimu Inxeba ngenxa yenzinsongo zokuthi azobhikishelwa.
Ifilimu, okukhulunywa isiXhosa kuyo neqale ukukhonjiswa emabhayisikobho ngoLwesihlanu, imayelana ngokuthandana kwabesilisa ababili abayosoka entabeni.
Iqale ukuba sematheni ingakaphumi njengoba namanje isaqhubeka imvunge ngayo. Ukugxekwa kwayo kuze kwenza nokuthi ivalwe emabhayisikobho akwaNu Metro. Okhulumela iDA, uPhumzile Van Damme, ukugxekile ukusatshiswa kwabantu. Uthe bayawemukela umbono walabo abangafuni ikhonjiswe kodwa lokhu akungabukeli phansi ilungelo elikumthethosisekelo.
“Ifilimu ayilibukeli phansi ilungelo lesiko. Ayilihlambalazi futhi isiko lamaXhosa ulwaluko. Noma kunjalo lokho akusho ukuthi iphutha. kumele ivalwe.”
Izolo iSABC News ibike ukuthi iSter Kinekor, ebeyikade ithe izoqhubeka nokuyikhombisa, seyiyivalile emabhayisikobho ayo eWestern Cape.
Abantu balokhu bephawule njalo ngayo ezinkundleni zokuxhumana.
UKhaya Dlanga, onganqeni ukuveza umbono wakhe ngezinto futhi ongumbhali wezincwadi, uthe usejahe kabi ukuyoyibuka uma ebuya eNingizimu Afrika. Uthe uyayeseka futhi ukholwa ukuthi wonke lumsindo okhona awunasisekelo.
“UNelson Mandela uchaza kabanzi ngokusokwa uma uyindoda yomXhosa encwadini iLong Walk to Freedom. Akukaze futhi namanje akukho mbhikisho ngalokhu kuze kube yinamhlanje. Inxeba kumele liyekwe. Labo abafuna ukulibuka, abalibuke.”
Umsakazi woKhozi FM, uNomfundo Mkhize, ubesezwe lukhulu ngayo wabe esethatha isinqumo sokuyoyibuka.
“Ngokwami akukho lapho kuvela khona imfihlo ngesiko lokwaluka noma lapho libukelwa phansi khona. Mina angiyibukanga ngokuthi ikhuluma ngesiko lwamaXhosa. Ingenze ngazibuza ukuthi thina siziphatha kanjani izitabane noma abantu abahlukile kunathi. Umsebenzi wobuciko ukuxoxa indaba ezenzekayo hhayi kuphela ngamaqhawe akudala. Abantu abayibuke ukuze bahlanganyele kwinkulumompikiswano.”
Umpheki futhi oyijaji leTop Chef SA, uLesego Semenya, uthe ayikhombisi olutheni ngesiko lwamaXhosa ngaphandle “kwesivele sesikwazi sonke.”